AP-a sorkar dinna tur kawng hawng

Supreme Court-in Arunachal Pradesh-a sorkar thar a din theih nan kawng a hawng zel a, President's rule hlih a khapna pawh a sut tak avangin sorkar thar a din thuai beisei a ni.

He state-a Congress MLA hel 14, Speaker-in MLA an nihna atanga a bànna kal tlangpui lohna tur thupek, Gauhati High Court-in a lo siam tawh bawk Supreme Court hian a hnawl duh lo va, heng MLA-te hi insawifiahna hun pawh siamsak lova bàn nia sawi chu court sang ber chuan a pawm a ni.

MLA 14 hi Speaker hlui, Nabam Rebia-a'n a ban a, he thubuai ngaihtuahnaah hian Supreme Court ukil lar ber ber, Fali Nariman leh Kapil Sibala'n Congress ai awh mah se, Supreme Court chuan Larsap, JP Rajkhowa chu sorkar thar la lut rih lo turin thu a pe duh ta lo a ni. Arunachal Pradesh-ah hian Congress kaihhruai ni lo, sorkar dang a din mai loh nan Rajya Sabha-a Congress hruaitu, Gulam Nabi Azad, Anand Sharma, Kapil Sibal leh V. Narayanasamy chuan President hmuin, state Larsap, JP Rajkhowa-a chu CM atana Congress hel hruaitu, Kailkho Pul lak luh tumah an puh a, he thilah hian inrawlh thuai turin President chu an ngen a ni. Hemi hma hian Kailkho Pul-a hian amah thlawptu, MLA 31 hruaiin Larsap hi a hmu a, sorkar thar siam tura amah sawm turin a ngen a ni.