Maharashtra-a Bharatiya Janata Party (BJP) leh Shiv Sena thawkdun chuan ṭangrual sorkar siam dan turah inremna an la siam thei lo.

MLA ngah zawk BJP chuan nimin khan Governor Bhagat Singh Koshiyar hmuh an tum a, mahse a hnuah ṭhulhin Shiv Sena chu nimin tlai thleng kha hun pe lehin, an thutlukna an ngaichang leh phawt dawn tih an sawi. Nimin vek han Shiv Sena chuan an party hotu, Uddhav Thackeray hoin meeting an nei nghal a ni. 

Assembly seat 288 awmnaah BJP hian seat 105 neiin, Shiv Sena hian seat 56 an nei a ni. Shiv Sena hian ṭangrual sorkar an siam turah chanpual inzat, 50:50 a insem a, chief minister post pawh term chanve chhung ve ve inchelh chhawk an phut a, hei hi BJP lamin an pawmsak thei lo a ni. 

Maharashtra finance minister leh  BJP hruaitu hlun, Sudhir Mungantiwar chuan Shiv Sena nena inhriatthiam lohna an neih mek chu chinfel theih ngei an tum tih a sawi. Sorkar ngelnghet tak siam an duh a, Shiv Sena nena ṭangrual sorkar din ngei pawh an tum thu a sawi. 

Party pahnihte inkar boruak ṭha lo tihdaihna atan chief minister-ah union minister Nitin Gadkari dah a ni dawn nia thuthang awm pawh thu dik lo a nih thu Mungantiwar chuan sawiin, Gadkari chu Maharashtra politics-ah a kir dawn lo tih a sawi a ni. Gadkari pawhin hei hi thu dik lo a nih thu sawiin, Shiv Sena nen thawkdunin BJP chuan sorkar thar an siam ngei dawn a ni, a ti. Hemi rual hian BJP chuan seat 105 a lak avangin, chief minister pawh BJP lam an nih ngei a ngaih thu a sawi bawk. 

November 9-ah Maharashtra assembly term hi a tawp dawn a, hei vang hian BJP chuan term tawp hmaa sorkar thar siam hman ngei a duh a ni. Assembly term tawp hmaa an tihfel hman loh chuan chief minister Devendra Fadnavis chu a ban a ngai dawn a ni. 

Share this Post