Mumbai court-ah David Headley a inlan

Kum 2008-a Pakistan firfiakten Mumbai khawpui an beih theihna tura firfiakte puitu, Pakistani-American David Coleman Headley-a chu nimin khan video conferencing hmangin Mumbai special court hmaah a inlan.

US jail-a tang mek, David Headley-a hi 26/11-a Mumbai beih chungchangah zawhna 40 vel zawh a ni a, hengte hi ṭha takin a chhang vek a ni. Darkar 5 chhung zawhna zawh a ni.

Kum 55 mi, David Headley chuan kum 2002-a LeT dintu, Hafiz Saeed-a thusawi a ngaihthlak ṭumin a hneh em avangin firfiak pawl chu a zawm phah tih a sawi a, he pawl chet dan hrang hrangte a sawichhuak. LeT training camp-a a awm laiin India chu Islam hmelma a nih thute zirtir an ni a, Islam hmelmate chu an bei tur a ni tihte an zirtir tih a sawi. Traning camp-ah hian ṭum ruk a kal hman a ni.

Kashmir-ah India sipaite bei tura kal a duh tih Headley chuan a sawi a, mahse a kum a upat tawh vangin firfiak pawl hian thil danga hman ṭangkai an duh tawh zawk tih LeT commander Zakiur Rehman chuan a hrilh niin a sawi.

Headley chuan LeT-a a thawhpuite pawh sawiin, a bikin Sajid Mir chu a biak pawh ber ṭhin thu a sawi. Sajid Mir hi Pakistan intellingence agency, ISI chuan an hum tlat nia sawi a ni.

Kum 2006 khan Headley hi Pakistan-ah man a ni a, thu zawtfiahtu officer Major Ali chuan a chhuahtir hnuah, ISI hotu Major Iqbal nen a inhmelhriattir thu a sawi. "India rama kal ka tum thu ka hrilh chuan Major Iqbal hian intelligence agency ka puih theih a ring ta a ni" a ti.

David Headley hi a hming tak chu Dawood Gilani a ni a, mahse kum 2006 khan America mi anga India rama a rawn luh a, sumdawnna bul a ṭan theihna atan a hming hi David Headley tia a thlak thu a sawi. A hming a thlak hnu hian India ramah kum 5 awm theihna tur visa a hmu a ni. Visa a hmuh theihna tur hian Pakistan Army-a doctor, Tahawwur Hussain Rana chuan a pui tih a sawi.

Kum 2008-a Mumbai beih a nih hma khan Headley hian ṭum riat zet Mumbai hi a tlawh hman a, Delhi-ah vawi khat a zin bawk. Mumbai khawpui beih a nih hnuah khan vawi khat a rawn zin leh a ni.

Mumbai khawpuia firfiakten an beih turte hi a rawn thlithlaiin video in a lo la vek a ni. Hemi kum vek September leh October thla khan Mumbai hi beih an lo tum tawh niin a sawi. September thlaa Mumbai beih tuma firfiak kalte hi tuipuiah an lawngin lung a sut avangin an ralthuamte an hloh vek a, October thla khan beih an tum leh a, hei pawh hi an hlawhchham leh, a ṭum thumna November thlaah an hlawhtling ta a ni, a ti.

Pakistan firfiakten kum 2008, November thlaa Mumbai khawpui an beih kha Pakistan army leh ISI-ten an thlawp thu leh, Pakistan senior official pathumte an inhnamhnawih thu Headley hian a lo sawi tawh bawk.