United Nations (UN) member zingah a hun taka budget pe tlak chu ram 34 chauh an awm a, heng zingah hian India pawh a tel. 

India hian January 31, 2019 khan a regular budget, US dollar maktaduai 23.25 chu a pe a ni. UN Financial Regula­tion Rules chuan budget pekna hun hi ni 30 hun a pe a, mahse hun bithliah chhunga budget pe hi India leh member dang 33 chauh an awm. Hun tiam chin a ralh hnuah, member 95-te chuan an budget hi an pe tlak ve leh tho a ni. 

UN-in a tarlan danin, October 8 thlenga budget pe tla ram hi 129 an awm a ni. Member ramten kum 2019 budget atana an sum pek hi USD tluklehdingawn 1.99 a tling a, hetihlai hian budget la lut lo hi USD tld 1.386 a la tling. Ram 64-in budget hi an la pe tlak lo a ni. 

India hi a hun taka UN budget pe tla ram zingah a tel laiin, UN chuan kumin March thla thlenga peacekeeping opera­tion atana a sum batsak tam zingah a tel a, UN hian India hnenah USD mtd 38 pek tur ala nei a ni. Hetihlai hian UN hian sum lam indaih lohna nasa tak a tawk mek a, UN Seceretary General Antonio Guterres chuan thla tharah chuan an hnathawktute hlawh pek tur daih pawh an nei tawh dawn lo niin a sawi. 

Share this Post