Hyderabad ngamtu Jamshedpur FC

Match hmasa pahniha hnehna an chan zawh loh hnuah Jamshedpur FC chuan hnehna an chang ve ta a, an mikhual Hyderabad FC chu Ningani zan khan 1-0 in an hneh - he inkhela goal awmchhun hi Rei Tachikawa-a'n freekick hmanga minute 76-naa mawi zeta a khung a ni.

Japanese midfielder hian Maltese Premier League club Sirens aṭangin Jamshedpur hi season ṭan dawn khan a zawm a, Men of Steel (Jamshedpur sawina) a zawm hnua a goal hmasa ber a khung.

Jamshedpur-in hnehna an chan avangin match hnih an khelh tawh aṭangin point li an nei ta a, ISL club hmuhnawm pawl ni ṭhin Hyderabad tan erawh result lawmawm lo a ni a, match hnih an khelh tawhah an la tlawm ve ve - coach Thangboi Singto leh Conor Nestor tan result lawmawm a ni lo.

Jamshedpur tan Ricky Lallawmawma leh PC Laldinpuia ten inkhel bul an ṭan a, Hyderabad lamah Mizo player inlan an awm lo thung. Nizan khan Punjab FC leh NorthEast United an inkhel ve zui a, an result kan hre hman lo.

Zaninah ISL match hnih a awm dawn a, Ayush Chhetri khelhna FC Goa chuan Mizo pakua awmna Odisha chu tlai dar 5:30 hian an mikhual dawn a, zan dar 8:00-ah Lalrinliana Hnamte (Terina) khelhna Mohun Bagan chuan Mizo awm lohna Chennaiyin an lenchilh ang.

Pathianni zan dar 8:00-ah Lallianzuala Chhangte, Lalengmawia Ralte (Apuia) leh Hmingthanmawia (Valpuia) te khelhna Mumbai City chuan Kerala Blasters an mikhual dawn a, South Indian club-ah hian Mizo defensive midfielder Freddy Lallawmawma a awm.