Shashi Tharoor-a'n PM lehkha thawn ‘Mann ki baat’ hi ‘maun ki baat’-ah chantir suh

Congress leader Shashi Tharoor chuan Thawhlehni khan prime minister Narendra Modi hnenah lehkha thawnin, ramchhunga mipui thinrimin mi an sawisak hlum thleng ṭhin chungchanga mi 49 laka July 23-a FIR thehluh chungchangah ngawi reng lo turin a ngen.

Shashi Tharoor hian Modi hnenah hian phek hnih zeta thui lehkha a thawn a, ram danpui Article 19-a thu inziak nemnghet turin leh 'freedom of speech and expression' nemnghet turin a ti a ni.

"July 23, 2019-a ramchhunga mipui thinrimin mi an sawisak hlum ṭhin pung zel chungchanga, Muzaffarpur, Bihar-a India khua leh tui mi 49 laka FIR thehluh khan rilru a tibuai takzet a ni. Inhuatna vang emaw naupang rukbo chungchang thuthang dik lo avang emawa mipui thinrimin mi an sawisak hlum ṭhin hi natna ang maiin a darh nasa hle a, heng mite (FIR thehluttute) hian i hnena an rawn hriattir che hi thil dik tak an ti a ni," tiin a ziak. 

Thiruvananth-puram MP chuan, "Right to freedom of expression i pawm a ni tih rin kan duh, ‘mann ki baat‘ hi ‘maun ki baat’-ah a chan lohna turin," tiin, thla tinin mipui thinrimin mi an sawisak hlumna thleng ṭhin chungchang chu ngawih bopui lo turin a ti.

"Kan ram ropui tak hi mi hrang hrang, ngaihdan hrang leh ideology hrang hrang hmanga din a ni. Hei hi India hlawhtlintirtu leh 'vibrant democracy' siamtu pawh a ni. I thil thlirdan sawiseltu emaw dodaltu emawte chu hmelma emaw 'anti-national' emaw anga ngaih tur a ni lo," a ti bawk.

A twitter lamah pawh 'freedom of expre­ssion' pawmtute chu a lehkha PMO emaw Modi twitter account-ah emaw a lehkha thawn ang thawn ve turin a ngen zui bawk a, a lehkha thawn thlalak hi a tarlang tel bawk a ni. 



Share this Post

Login to comment
No Comments