Israel Prime Minister-in Kristian beitute na taka hrem a tiam

Juda sakhaw vuantute'n Jerusalem Old City-a biak ina kal Kristiante chil an chhak khum lai video a darh hnuah, Israel prime minister Benjamin Netanyahu chuan pawi khawihtute chu na taka hrem tiamin, ngaihhnathiamna a awm lo ang a ti.

Social media-a video darhah hian, ultra-Orthodox Juda sakhaw vuantute chuan Via Dolorosa hmuna kraws pua kawng an zawh lai chu chil an chhak khum a ni. Helai hmun hi Jerusalem khawpuia awm a ni a, Isua khenbeh a nih dawna kraws pua a kalna hmun niin Krisiante chuan an ring a ni.

PM Netanyahu chuan, "Sakhua betute chunga pawi khawihna eng pawh thleng hi na takin ka dem a, a rang thei ang berin action lak a ni ang. Hetiang pawi khawihna thleng hi thil hlauhawm tak niin pawmzam theih a ni lo. Pawi khawihtute chu ngaihhnathiam an ni dawn lo," tiin a sawi.

Video darh hma lawk hian, Jerusalem Old City thoah hian Kristiante tihnawmnah lai video a lo darh tawh bawk a ni.

Thla hmasa khan Archbishop Pierbattista Pizzaballa chuan, Jerusalem Old City-a Kristiante tihduhdahna thleng ṭhin hi thil thar a nih loh rualin, tun hnaiah a thleng zing lehzual tih sawiin, tihduhdahna thlen zin chhanah Israel sorkar a mawhpuh tel bawk.

Netanyahu-a kaihhruai ṭangrual sorkarah hian ultra-Orthodox leh far-right party-te pawh an tel a, Israel chanchinah tun ṭum hi sorkarin right-wing a awn ber ṭum a ni hial.