Telangana transport department (RTC) hnathawk 48,000-te chu an hnathawh report pek hun tur chhunga an pek hman loh avangin, anmahni leh anmahni an inban thu chief minister Chandrashekar Rao chuan a sawi.

Telangana CM Rao chuan tunah hian RTC-ah hnathawk lai 1,200 an awm thu sawiin, bangtate hi state sorkar hian a ban a ngai hran lo a, kar kal ta Inrinni tlai dar 6 thleng khan in report turin hun pek an ni a, report thehlut lo chu anmahni leh anmahni an inban ta a ni, a ti.

RTC ban takte hi kar kal ta Zirtawpni aṭanga Inrinni thleng khan, Rao sorkar laka thil an ngiat vangin nawrh an huaihawt a, mahse sorkar chuan nawrh titawp a, hnathawk tura in report turin a hriattir a ni. 

Nawrh huaihawtte hian an state ṭhenawm Andhra Pradesh tihdan zul zuiin, RTC leh state sorkarte chu inthlunzawm turin an phut. Kum 2017 April aṭanga an hlawh tun thlenga ennawn loh a nih vangte, hnathawh tur hautak lutuk tihziaawm a nih theih nan, hnathawktu tur lakbelh te leh thil dang 26-te chu Rao kaihhruai sorkar lakah hian an phut a ni.

Hnathawktu 50,000 te nawrh avang hian  cheng vaibel­chhe 1,200 hloh a nih thu Rao chuan a sawi. Ban takte hi engti kawng zawng maha ngaihdam theih a nih loh thu leh, hnathawktu thar an lak vat dawn thu a sawi bawk.

Telangana transport depart­ment chuan Telangana State Road Transport Corporation (TSRTC) hi hmun thumah ṭhenin, an bus neih 50% (Bus 5,200)-te chu TSRTC kutah a awm. Bus 3,100 (30%) chu TSRTC kaihhruaina hnuaia hmun dang aṭanga hawh a ni a, a dang bus 2,100 (20%) private kutah a awm bawk a ni. TSRTC-in an bus neih 21% chu hmun dang aṭanga an hawh a ni.

Share this Post