Ram rorelnaah hnam dang nupui

MZP President thlan thar chuan, hnam dang kawppui neite’n Assembly House-ah ṭhut tuma hma an la chu MZP-in pawi an tih thu sawiin, ram leh hnam him nan theihtawpa an dodal dawn thu a sawi a, "Mizo hmeichhiate'n hnam dang pasal an nei hi ṭha kan tih loh thu nasa takin kan tlangaupui ṭhin. Hnam dang kawppui neite’n tun hnaiah ram rorelna sang Assembly House-ah ṭhut tuma hma an la hi pawi kan ti," tiin theihtawpa an dodal tur thu a sawi.

Hnam dang nupui pasala neih chungchang hi inhnial theih tak thil a ni a, mi tam zawkin hnam himna atan a ṭhat loh thu an sawi a, ṭhenkhat chuan mimal zalenna a nih thu an sawi ve bawk. Mahni nupui pasal turah hi chuan mi dang leh hmelhriat loh rawn kher ti lo hi eng emaw zat an awm a, kawppui atana hnam dang nei ta pawh a pung zel.

Mizote chang ni loin India hmarchhaka tribal dangte pawhin hnam dang kawppui neih chungchang hi an lo khel fo tawh ṭhin a, hnam tana him loa hriain sawiselna pawh a lo awm fo tawh.

Hetihlai hian MZP lamin an ngaimawh hi hnam dang pasal neih mai ni lo, hnam dang pasala nei tawhten Mizoram rorelna ina thuneih an tum hi a ni a, he thil hi ngun taka ngaihtuah ngai thil a ni reng a ni. Mimal nuna inrawlh a rem lo a nih pawhin, kan ram rorel khawla hnam dang nupui an awm hi nakin zelah hnam tan a him loh dan a awm thei a, he thilah hian MZP hian dotu aiin thlawptu a nei ngah zawk ngei ang.