Firfiakte puia puh vangin J&K DSP hna aṭangin chawlhtir

Jammu & Kashmir (J&K) deputy superintendent of police (DSP) Devinder Singh chu Hizbul Mujahideen firfiak pahnih J&K aṭanga tlanchhuah tumte puia puh a nih avangin a hna aṭanga chawlh lailawk tir a ni. 

Kar kal ta Inrinni khan J&K police-te chuan Singh hi Sopian distirct-a Nazneenpora hmunah an man a, Nilaini khan a hna aṭang chawlh lailawk tir a ni zui. 

Jammu & Kashmir Inspector-general of police (IGP) Vijay Kumar chuan Hizbul Mujahideen fir­fiakte chuan J&K chhuahsan turin Srinagar aṭangin Jammu lam an pan tih thu an dawng tih sawiin, police-te chuan a chhui hna hi a rang thei ang berin Sopian distirct-a Nazneenpora hmunah an bawh zui nghal a. Nazneenpora-ah hian DSP Devinder Singh motor rawn khalh chu police-te chuan an lo danga, a motor-ah hian Hizbul Mujahideen firfiak Asif Ahmad leh firfiak an zawn Naveed Babu-te chu hmuh an ni, a ti. 

Singh motor-ah hian grenade panga hmuh a nih bakah police-te chuan a in an dap sak bawk a, AK-47 rifle, pistol pahnih, grenade pahnih leh pawisa nuai chuang an man bawk. Nikum October thla khan Kash­mir bula civil mi 11- kut hnathawk, driver leh thei zuar te thattu zinga telah Naveed Babu hi J&K police-te chuan an puh a, reife an zawn hnuah kar kal ta Inrinni khan DSP Devinder Singh motor-ah hian an hmu ta a ni. Devinder Singh thubuai hi National Investigation Agency (NIA) chuan chhui hna a thawk dawn a, Ministry of Home Affairs (MHA)-in police-te hnena chawi­mawina a pek ṭhin, kum 2018-a a dawn 'Gallantry Medal' pawh hlihsak a ni nghal bawk.