Palestinian firfiak pawl, Hamas chuan Gaza Strip-a inkahhai puan a nih theihna tura an hmalakna pakhat atan, an mi hren mek zinga mi Israeli-American Edan Alexander chu an chhuah dawn tih an sawi.
Edan Alexander hi Israeli-American sipai, US-a seilian a ni a, kum 2022 khan Israel-ah pemin sipaiah a lut a ni. October 7, 2023-a Hamas-in Israel an beih ṭum khan an base aṭangin man a ni a, Hamas hren mek zingah hian US khua leh tui nihna nei panga an la awm a, mahse Alexander hi an zinga la dam awmchhun nia hriat a ni. Hamas hian an chhuah hun tur tak erawh an la sawilang lo.
Hamas hian Israel an beih ṭuma an mi man, mi 251 zinga mi 59 chu Gaza-ah an la hreng mek a, an zinga hmun thuma ṭhena hmun khat chu an la dam nia rin a ni. An mi man zinga a tam zawk chu inkahhai an puan hmasak leh, inremna dang an siam hnuaiah an lo chhuah tawh a ni.
US president Donald Trump chuan vawiin hian Middle East a tlawh dawn a, a zin chhuah hmain Hamas lam hian he thutlukna hi an siam a ni. Hei bakah Gaza-a chhawmdawlna thawn luh a nih theihna tur inremna pawh siam an tum tih an sawi.
Gaza-a Hamas hruaitu, Khalil al-Hayyah chuan an pawl chu US aiawh nen Qatar-ah mi dang kaltlang loa inbiakna an neih thu a sawi. Gaza Strip-a indona tih tawp a nih a, inremna a awm theina tura inbiakna nei turin an inpeih tih a sawi bawk.
Israel chuan Gaza luhka hi ni 70 chhung a dansak tawh a, ei tur baka damdawi lam pawh dangin hei hi Hamas-in an mi hren mekte an chhuahna tura a nawrna a ni. UN leh aid group dangte chuan Gaza-a chengte chuan supply pawh a tlem tawh hle tih sawiin, thla 19 an indo tawh chhunga mipuite dinhmun chhiat lai ber niin an sawi.
Hetih lai hian Palestinian civil affairs chungchang buaipuitu, Israel military body COGAT chuan thla hnih chhung inkahhia puan lai khan chhawmdawlna tur an mamawh angte chu thawn luh hman a ni tiin, Israel aṭanga tui pekna pathum zinga pahnih pawh hman chhunzawm reng a la nih thu a sawi thung.
