South Korea ram chhim chhak lamah ram kang nasa tak a thleng mek a, kangmei chhuak vang hian nimin thleng khan mi 18 an thi tawh a, hliam tuar 20 chuang an awm bawk.
Official-te chuan ram kang hi hmun eng emaw zatah a thleng tih sawiin, kangṭhelh hna hi kangṭhelhtu pawl leh sipai 5,000 chuangin an thawk mek a ni. Mahse khua a ro avang leh, thli na tak a tleh tel avangin kang ṭhelh hna hi thawh chak a harsat thu an sawi.
South Korea official Yonhap news agency chuan ram kang hi kar liam ta Zirtawpni aṭanga chhuak a nih thu a tarlang. Hmun ṭhenkhat chu ṭhelh mih ni tawh mah se nimin thleng khan hmun panga chu a la kang nasa hle.
Kangmei chhuah ṭanna hi Northern Gyeongsang province-a Sancheong county-ah niin, rei loteah Uiseon county a kangkai a ni. He hmun hi an ram khawpui, Seoul chhim chhak lam km 180 vela hlaa awm a ni. Kangmei hi Andong, Cheongsong, Yeongyang leh Yeongdeok county-ahte a kangkai bawk. Ram acre 42,000 vela zau a kang chhe tawh a, building leh structure tam tak kang chhiain heng zingah hian Uiseong-a kum 1000-a upa Gounsa temple pawh a tel. He temple-a thil hlu tak tak awmte chu hmun him lamah sawn a ni tih official-te chuan an sawi. Hahoe Folk khua, UNESCO World Heritage Site pawh kangmei chhuak hian a hnaih sawt em avangin emergency alert tih chhuah a ni tawh bawk.
Thuneitute chuan ram kang thlenna biala khawpui hrang hranga chengte chu hmun him lama insaseng turin an hriattir a, mi 23,000 chuang chu an insawn chhuak tawh. Ram kang ṭhelh tur hian sipai leh kangṭhelhtu sang tel tirh an nih bakah, helicopter 146 hman a ni bawk a ni.
Acting president Han Duck-Soo chuan ram kang ṭhelhna atan hian thawktu leh an hmanrua neih angte hman vek a ni dawn tih a sawi a, mahse thli chak tak a tleh tel avangin ṭhelh mih a harsat thu a sawi. Hetiang ang ram kang nasa hi an ramin an la tawrh ngai loh thu a sawi bawk. Ṭhelh mih a nih hunah sorkar chuan hma lak dante ngun takin a thlir let ang a, hetiang harsatna leh chhiatna thlen thei laka invenna ṭha tak siam dan tur an ngaihtuah nghal dawn tih a sawi.
