United States president hlui leh kumin inthlana Republican presidential candidate ni tur, Donald Trump chu Butler, Pennsylvania-a election rally a neihnaah silaia kah hliam a ni. Rally-a tel mi pakhat chu kah fuh niin a thi a, hliam tuar pahnih an awm bawk.
Donald Trump thah tumna hi an ram huna July 13, Inrinni tlaia thleng niin, rally an neihna hmuna dawhsana a lawn hnu, thusawi a ṭan hnu lawkah kah a ni. Trump hian dan loa ramri kan an pung zel tih a sawi laiin silai vawi nga hmeh puah a ni a, silaimu pakhat chuan Trmup hi a beng ding lamah fuhin Trump chu a kun hniam a, amah venhim tumin Secert Service agent-te chuan dawhsan lam an pan chho nghal a ni.
Trump hi kah a nih hnu lawk hian dawhsanah ding chhuak lehin mipuite lamah a kut hum ruhin a ṭhat thu a sawi. Hmun him lama hruai a nih hnu hian Trump chuan,"Silai hmanga kah ka ni a, ka beng ding lam hi a fuh a ni" a ti. United States Secret Service leh Law Enforcement-a thawkte chu amah venghim tura rang taka an chet vangin lawmthu a sawi.
U.S. Secret Service chuan silai hmet puaktu hian rally neihna pawn lam, hmun sang lai aṭangin a kap tih an sawi a, pawikhawihtu hi an kaphlum ve nghal a ni.
Butler-a kah a nih hnu hian Donald Trump chuan a private gold club awmna, New Jersey lam a pan a, a social site Truth-ah inkahna thleng a hriat dan tarlangin, "Silai ri leh boruaka thil thlawk ri fua ka hriat khan thil awmdan a dik lo tih ka hrethiam a, ka vun chu silaimu in a fuh tih ka hre leh nghal. Ka thi nasa hle a, thil thleng chu ka hrethiam ta khawp mai" a ti.
Joe Biden a ṭawng chhuak
US president Joe Biden chuan Trump rally-a inkahna thleng chungchangah Inrinni zan khan Donald Trump hi a be nghal a ni. Trump a ṭhat avangin a lawm tih sawiin Trump leh a chhungkua bakah rally-a tel mipuite tan a ṭawngṭai reng tih a sawi bawk. America-ah hetiang tharum thawhna thlen chingte tan hmun a awm lo tih Biden chuan a sawi.
US vice president Kamala Harris pawhin Trump a hliam na lo tih a hriat chuan a thla a timuang tih a sawi ve bawk. Trump leh a chhungkua bakah he inkahnain a nghawngte leh hliam tuar zawng zawngte an ṭawngṭaipui tih sawiin, he inkahna thleng hi mi zawng zawngin an dem a ngai a, tharum thawhna dang a chawh chhuah loh nan mipuite chuan tihtur an nei tih a sawi.
Tunge Trump thah tumtu?
Federal Bureau of Investigation (FBI) chuan Donald Trump kaptu hi Bethel Park, Pennsylvannia-a cheng, kum 20 mi Thomas Matthew Crooks a ni tih an tarlang. Trump thah a tum chhan an la chhui chiang mek tih sawi bawk.
Thomas Matthew Crooks hi Republican party-a inziak lut niin kumin inthlan hi a vawi khat vote thlakna tur a ni. Kum 2022 khan Bethel Park High School aṭangin a graduate a, Pittsburgh Tribune-Review in a tarlan danin National Math and Science Initiative hnen aṭangin 'star award' USD 500 a dawng tawh bawk.
Crooks hian thil siam chhuahna inchung aṭangin Trump hi a kap nia tarlan a ni a, hei hi Trump thusawina dawhsan aṭanga pen 130 vela hla a ni. Silai a hmehpuah hnu hian US secret service sniper chuan Crooks hi an kaphlum ve nghal a, Trump kah nana a hman rifle pawh a hnuah man a ni.
Crooks hian amah hriat theihna tur ID inkahna hmunah hian a keng lo tih dan kengkawhtute chuan an tarlang a, FBI special agent Kevin Rojek chuan thlalak aṭang leh DNA test hmangin an kah hlum hi Crooks a ni em tih finfiah an tum mek tih a sawi.
US Congress Committee-in Secret Service Director ko
Donald Trump kah a nih chungchangah Secret Service lamin sawisel an tawh phah nasa. US Congress-a Oversight Committee chuan pawikhawihna thleng chungchangah Secret Service Director, Kimberly Cheatle chu thu zawhfiah turin July 22-a inlan turin an ko.
Secret Service hi US President hlui leh President ṭanglai vengtu an ni a, Trump-a chunga thil thleng chungchangah hian an hnaah an hlawhchham chiang hle nia ngaih an ni. US politician leh mipuite pawhin, Trump awmna hnaivai tak inchunga ralthuam nena a thattu a awm theih chhan hi an hre duh a tih an sawi. He pawikhawihna thlen dan hi FBI, Secret Service leh Department of Homeland Security chuan an chhui zui mek.
US President thah lo ni tawhte
Abraham Lincoln: Lincoln hi US president 16-na niin US president zinga thah hmasak ber a ni. Mipuite ngainat hlawh president Lincoln hi a nupui nen Ford Theater, Washington-a lemchan an en laiin John Wilkes Booth chuan a tukhumah kapin damdawi-inah hruai nghal ni mah se a tuk zing, April 16, 1865-ah a hliam tuar loin a thi ta a ni. President Lincoln thattu Booth hi April 26, 1865 khan kah hlum a ni ve a ni.
James Garfield: James Garfield hi July 2, 1881 khan New England pan tuma rel chawlh hmuna a awm laiin Charles Guiteau chuan a kap a, Garfield hi thi nghal mai loin a hliam chu kar eng emaw zat enkawl niin New Jersey lamah hruai a nih hnuah a thi ta a ni. Garfield hi US President 20-na niin thla 6 chhung president a ni hman a, president kah hlum pahnihna a ni. A kaptu Guiteau hi man a nih hnuah thiam loh chan tirin June 1882 khan tih hlum a ni.
Willaim McKinley: US President 25-na, McKinley hi September 6, 1901 khan Buffalo, New York-a thu a sawi zawha amah lawmtu intlarte a chibai laiin Leon F. Czolgosz chuan hmun leh hmunah a awmah a kap a, ni 8 chhung enkawl a nih hnuah September 14, 1901-ah a thi. McKinley hi a term hnihna atana thlan a nih hnu thla ruknaah thah niin vice president Theodore Roosevelt chuan a thlak a ni.
John F Kennedy: US president thawm na leh khawvel mipuite duh rawn, John F Kennedy hi President 35-na a ni. November, 1963 khan Dallas a motorcade parade an neih laiin kah a ni a, a bula chuang Dallas Governor pawh kah fuh niin Parkland Memorial Hospital-ah kalpui a ni. John F Kennedy hi damdawi-in an thlen hnu rei loteah a thi a ni. Kennedy hi Lee Harvey Oswald chuan Texas School Book Depository aṭangin a kap a, Oswald hi ni hnih hnuah Jack Ruby chuan a kap hlum ve leh nghal.
