Pakistan prime minister hlui Nawaz Sharif fanu, Maryam Nawaz chuan prime minister Imran Khan chu na taka sawiselin, bang tura a phut thu a sawi. 

Pathianni zan khan Mandi Bahauddin-ah rally neiin, kum 45 mi Pakistan Muslim League-Nawaz (PML-N)  vice president Maryam Nawaz chuan cricketer-turned-politician, Imran Khan chu an rama rorel turin dikna a nei lo tih a sawi a ni. 

Maryam Nawaz chuan, "Banna thehlut la, haw nghal rawh!," tiin Khan chu a hrilh a, mipui pungkhawmte pawh a auhla hi zawm turin a ti bawk. Maryam chuan a pa, kum 69 mi Nawaz Sharif dam ṭha lo chunga jail-a hren reng a ni chu thilsual a ni tiin, hrem a nihna chhanah hian a phena inrawlh an awm a ni,  a ti. A pa chu chhuah a ni ang a, prime minister a la ni  leh ngei dawn tih sawiin, a hma aia chak zawkin a rawn kir leh dawn a ni, a ti. 

Kar kal ta Inrinni-a Lahore-a press conference a neihah, Mar­yam chuan court-in a pa chung­thu ngaihtuaha thiam loh a chantir danah thil dik tawk lo leh, inphiarrukna a awm tiin a lo sawi tawh bawk. Mahse judge Arshad Malik chuan hei hi thu dik lo a nih thu a sawi thung a, finfiahna ṭha tak behchhanin Sharif chu thiam loh chantir a nih thu a sawi. 

Share this Post