MNF-in bial himsa 10 kan nei, kan sorkar leh ngei dawn - Zorama

MNF party president Zoramthanga, chief minister ni bawk chuan, Mizoram inthlanpui awm turah bial him sa 10 an neih thu sawiin, "Inthlanah kan sorkar leh ngei dawn," a ti.

Zoramthanga hian nimina Mizo Hnam Rûna inkhawmah thu sawiin, "MNF chuan bial himsa 10 kan nei. Eptute chuan bial 30 aṭangin sorkar siam turin an rawn bei dawn a, an tan beisei tur a tam lo hle ang," a ti a; chuvang chuan inthlan leh hunah pawh an chak ngei dawn niin a sawi.

Tun hma lamah chuan MNF-in bial panga hloh sa tlukin inthlan an hmachhawn ṭhin nia sawiin Zoramthanga chuan, "Tunah erawh chuan bial 10 (Tlabung, East Tuipui & West Tuipui, Thorang, Tuichawng, Lawngtlai East, Lawngtlai West, Mamit, Hachhek, Chawngte leh Dampa)-ah ZPM leh Congress tih tham an awm lo," a ti.

MNF President chuan ZPM party chu party dang sorkarte chhe vek tia mipui fuihah a puh a, "ZPM thuvawn chu MNF leh Congress ni lo, tih a ni. An thusawi âwihtu mi tlemtê chu an innghahna awm chhun a ni mai. East Tuipui, Khawzawl, Saitual, Lengteng, Kolasib leh Serlui bial han en ila an tlinna tur a váng hle," a ti a, MNF chu kum 60 chhung an lungphûma nghet taka ding an nih thu a sawi.

Aizawlah pawh ZPM dinhmun a chhe sâwt hle nia sawiin Zoramthanga chuan, "Candidate an set a, anmahni leh anmahni an buai a, an buai tulh tulh mai. A tira sorkar tum kha tunah chuan an thaw lian ngam tawh lo. Páwl an sawn apiangin policy an thlak. Hei vang hian MNF a sorkar leh ngei dawn a ni," a ti a; ZPM chu policy mumal nei loah a puh.

Zoramthanga chuan, Mizoramah ráltlân tam tak an lut tawh tih sawiin, "Burma buaina a reh dawn emaw kan tih laiin refugee tam tak an lo lut. Bangladesh aṭangin a za tél, Manipur aṭangin a sing tél an lo lut tawh. Tripura-ah tlang mite inlâk hran duhna movement a thleng mek bawk. Pathianin Zoram, kan Jerusalem-ah hian unau min suih khawm a tum a ni. Eng nge lo thleng kan en zel ang," a ti.

Burma, Bangladesh leh Manipur aṭanga ráltlânte chuan tui anga nghet lote sorkar a pian loh nan theihtawp chhuah an tum niin MNF President chuan a sawi bawk.