Myanmar ramah tuilian avangin mi 40,000 chuang sawn chhuak

Myanmar ram hmun ṭhenkhatah ruah sur nasa avangin leimin leh tuilian an tuar mek a, chhiatna thlengah hian mi panga an thi a, mi 40,000 vel chu hmun him lamah sawn chhuah an ni tawh bawk.

Kumin May thlaa Cyclone Mocha-in chhiatna nasa tak a thlenna, Rakhine state chuan tuilian hi tuar leh mekin, khaw tam tak leh thlai chinna hmunte a chim mek a ni. Cyclone Mocha tleh avang khan Rakhine state-ah hian mi 400 chuangin nunna an lo chan tawh a, state hmar lam biala building 90% chuang a lo tichhe bawk a ni.

Myamnar ramah hian kum tin tun ang hunah hian ruah a sur nasa ṭhin a, mahse, kuminah chuan kum dang zawng aiin a sur nasa a, scientist-te chuan climate change nghawng zel niin an sawi.

July thla tawp lam aṭang khan tuilian hi an tuar ṭan a, state leh region pakuate chuan tuar nasa zualin an zingah hian Rakhine, Kachin, Karen, Mon leh Chin state-te an tel. Karen state-ah chuan leiminin Thailand nena an inkalpawhna kawngpui pawimawh a tichhia a, sipai sorkar chuan siam ṭha tur chuan thla khat chuang hun a ngai dawn tih a sawi.

Social welfare, relief and resettlement ministry-a director, Lay Shwe Zin Oo chuan tuilenna biala awm sawn chhuahte chu temporary camp-a dah niin, an department chuan an mamawh turte a pe tih a sawi.