Khawvel ram hrang hrangah khaw lum a zual

Khawvel ram hrang hrangah Thawhṭanni khan khaw lum a zual a; North America, Europe leh Asia-ahte health authority-te chuan mipuite chu pawn chhuak tam lo tur leh, tui in tam turin an chah.

Kumin June thla khan khawvela June thlaa khua a lum ber ṭum record niin EU weather monitoring service chuan a tarlang a, hetih lai hian July thlaah khaw lum hian zual lam a la pan belh zel a ni.

China-ah chuan Xinjiang regioin-a Sanbao khuaah khaw lum lam hian 52.2C a tling a, kum ruk liam taa khaw lum ber record a lo siam tawh, 50.6C a rawn khum.

Japan-ah pawh prefecture 47 zinga 32-ah khaw lum zual avangin alert tihchhuah a ni a, heatstroke avangin mi 60 enkawlin, Tokyo damdawi inah mi 51 dah luh an ni bawk.

Cyprus-ah khaw lum lamin 40C a pel chho a, Ningani thleng hian khaw lum hi a la zual dawn nia sawi a ni. Kum 90 mi pakhat chu heatstroke vangin a thi a, midang pathum chu damdawi inah enkawl an ni bawk tih health official-te chuan an sawi.

US khawthlang leh chhim lam state-ah pawh khaw lum zual avangin mi mtd 80 dawnte chu fimkhur turin thuneitute'n an chah ni. Khawvela hmun lum ber zinga mi, California-a Death Valley-ah chuan Pathianni khan khaw lum lam hi 52C dawn a tling bawk. Arizona state khawpui, Phoenix-ah chuan ni 18 chhung a zawnin 43C chung lam a ni tawh bawk a ni.

Italy thuneitute chuan mipuite chu khaw lum nasa tak thleng tur atana inbuatsaih lawk tura chahin; Rome, Bologna, Florence leh khawpui dang 13-ah red alert tihchhuah a ni.

Spain-ah pawh chhim lam bialah khaw lum lam hian 47C te a thleng.

Asia ram hrang hrangah pawh khaw lum nasa tak an tuar mek karah, ruah sur nasain hmun tam takah chhiatna a thlen mek bawk.