Emir of Kuwait a thi

Emir of Kuwait leh Kuwait Military Force-a Commander Sheikh Sabah al-Ahmad al-Jaber al-Sabah chu hun rei tak a nat hnuah, kum 91 mi niin September 29 khan a thi. 

Kuwait sorkar chuan ni 40 chhung  Sheikh Sabah sunna hun hman a nih tur thu a puang.  Sheikh Sabah thlaktu atan hian a unaupa, crown prince of Kuwait kum 83 mi Sheikh Nawaf chu September 30 khan Emir of Kuwait atana ruat a ni.

Sheikh Sabah hi kum 40 (1963-2003) chhung chu an ram foreign minister a lo ni tawh ṭhin a, ramdang nena thawhhona siam kawngah mi ṭangkai tak a ni. A hmalakna in kum 1990-a Gulf War zawh hnuah Iraq leh an ram chu thawhduna ṭha a neih pui thei bawk a ni. Heng bakah hian tualchhung buaina thleng ṭhin chinfel kawngah hmalatu pawimawh tak a ni bawk.  

Nikum August thla aṭang khan Sheikh Sabah hi a hriselna dinhmun a ṭhat loh thut avangin damdawi-inah dah luh a ni a, ziaawm lam a pan mai theih loh avangin kumin July thla khan US-ah zai a ni. US-a  Minnesota state-a Mayo Clinic-ah enkawl a ni a, he hmunah hian a thi zui ta a ni. 

Kum 1929 June 16 khan Sheikh Sabah hi a piang a, a pu hi Modern Kuwait hmuchhuaktu Mubarak al-Sabah a ni. A pu hian kum 1899 khan an ram leh Britain chu 'Treaty of Friendship' a lo ziah pui tawh a ni. Kuwait ram hi khawvela oil ngah ram a ni a, khawvel puma oil reserve awm zawng zawng aṭanga  8% chu Kuwait rama awm a ni. Khawvela oil reserve ngah ber ram parukna a ni mek bawk. Venezuela ram chu khawvela oil reserve nei tam ber ram a ni thung.