Philippines-in loneitute leiba USD tld 1 chuang a ngaidam

Philippines President Ferdinand Marcos chuan nimin khan an rama loneitu, mi nuai 6 chuangte leiba, USD tld 1.04 a ngaidam.

President Marcos hian 1988 land reform programme hnuaia loneitute hnena kum 30 chhunga an rulh tura ram an pek, mahse, loneitute'n a man an pek chhunzawm theih tak loh ngaihdamna tur, "New Agrarian Emancipation Act" chu pawmin nimin khan law-a chantir turin a hming a ziah hnan a ni.

President palace-a signing ceremony hun hmanah, President Marcos chuan, 'Heng loneitute hian an leiba rulhna tur hi an nei dawn lo tih kan hria a ni. Hei vang hian sorkar kuta dah mai hi tih tur ṭha ber a ni," a ti. Sorkar bank-te'n loan an ngaihdamsak chu, 'Kan mite tan theihtawp kan chhuah zel dawn tih lantir a ni bawk a ni," tiin a sawi.

Ram nei lo, loneitute maktaduai 3 dawn hnenah hian ram hectare mtd 4.8 vel pek a ni a, an ram pek hi Philippine land area aṭanga 16% vel a tling pha. Mahse an ram pek zinga hectare mtd 1.2 dawn neitute chuan a man an pe thei lo.

Sorkarin leiba a ngaihdam hi loneitute nuai 6,10,000 te'n an chhawr dawn a, mahse, hemi atana sum sen tur hi pesos tld 57.65 (USD tld 1.04) a tling dawn tih Marcos chuan a sawi. Sorkar hian pesos mtd 206 chu loneitute chhawmdawlna atan a hmang bawk ang.

Agriculture sector changtu ni bawk. President Marcos chuan agriculture sector chu tuaithar an ngai tih sawiin, tuna an hmalakna pawh loneitute thil tharchhuah nasa zawka tihpun tumna a ni, a ti.