Dailai Lama'n kum 88 a tling

Tibet sakhaw hotu, Dalai Lama chuan Ningani khan kum 88 a tling a, a pian cham pual hian khawvel puma remna leh muanna a awm leh, mihringte kan inngaihsak leh inlainat tawn chu a duh ber a nih thu a sawi.

Dalai Lama hi kum 1959-a China-in Tibet ram a awp duh lohna a lantir a nih hnuah, India ramah tlanchhiain Dharamsala-ah a khawsa zui a ni. China chuan Tibet sakhaw hotu hi China lak aṭanga inlak hran duhtu leh, China leh Tibet ṭhen darh a nih theihna atana Tibet mipuite fuihtuah a puh a ni. Mahse Dalai Lama chuan China sorkar puhna hi thudik lo a nih thu sawiin, Tibet-in an inrelbawlna kawnga thuneihna sang zawk an neih leh, Buddhist culture venhim chu a duh ber a ni tih a sawi ṭhin.

Kum 2011 aṭang khan Dalai Lama hian Tibet sorkar-a political role aṭangin a chawl a, hei vang hian a pian cham puala thuchah a tihchhuahah pawh politics kaihhnawih lam a sawi lang ngai lo a, sakhaw thil leh mihringte inhmangaih tawn a ṭulna lam hawi chauh a tichhuak tawh ṭhin.

Ram hrang hrang hruaitute'n Dalai Lama hi a pian cham lawmpuina an hlan a, an zingah hian US Secretary of State Antony Blinken pawh a tel.