UN-in West Bank-ah international force dah tum lo

United Nations Secretary-General Antonio Guterres chuan Israel-in Palestinian ram a luah, West Bank-ah UN sipai dah an tum lo tih a sawi.

Israel sipaite'n West Bank-a Jenin khuaa refugee camp-a ni hnih chhung beihpui an thlak hnuah UN hotu hian he thu hi a sawi a ni. Beihpui thlaknaah hian Israel sipaite hian Palestinian mi 12 an kap hlum a, sipaite chuan an mi kah hlumte hi firfiakte vek niin an sawi. Beihpui thlaknaah hian mi 100 chuangin hliam an tuar bawk. Palestinian lam chuan thi zingah hian civil mi an tel niin an sawi ve thung.

Antonio Guterres chuan Jenin beih a ni chu a dem thu sawiin, kum tam tak chhunga West Bank-a inbeihna nasa ber niin Ningania New York-a chanchinthar lakhawmtute a kawmnaah a sawi. Hemi rual hian West Bank-a UN sipai dah luh tumna erawh a awm lo tih a sawi a, hei hi Israel pawhin a remti dawn lo a, mahse, civil mite himna tur erawh chuan ruahmanna siam a ngai a ni, a ti.

Guterres chuan West Bank chu Israel sipaite thununna hnuaia awm a ni a, hei vang hian sipaite hian civil mite venhim chu an mawhphurhna a ni tih a sawi bawk.

Nimin khan UN Security Council chuan Jenin beih a nih chungchangah hian closed-door meeting an nei.

Jenin-a beihpui thlaknaah hian Israel sipai 1,000 vel telin, khawmual lama an beih bakah thlawhtheihna pawh an hmang tel a, civilian infrastructure pawh a chhe nual a ni. Israel sipaite hian hospital-te pawh an bei tel niin Physicians for Human Rights Israel (PHRI) chuan a tarlang. Ni hnih chhung beihpui an thlak hnuah Israel sipaite hian Jenin hi an chhuahsan tawh a ni.