Pakistan sorkar chuan prime minister hlui Imran Khan-a party, Pakistan Tehreek-e-Insaf (PTI) chu dan pawna hnawl dan chungchang a ngaihtuah mek niin defence minister Khawaja Asif chuan a sawi. 
Minister Asif chuan, "PTI hian Pakistan ram innghahna lungphum a bei mek a, hetiang thil hi a thleng ngai lo. En liam mai mai an ni dawn lo," a ti. 
May 9-a eiruk thubuaia Imran Khan man a nih avanga PTI member-ten an ram chhung hmun hrang hrangah buaina nasa tak a siam hnuah, sorkar chuan PTI chungchang hi a ngaihtuah mek a ni. 
PTI worker-te hian an party hotu man a nih avanga lungawi lohna an lantirnaah, Lahore, Karachi leh Islamabad-ahte pawikhawihna lian tak thlenin, Lahore-a Corps Commander chenna in luhchilhin, sipai leh sorkar building-te an bei tel bawk. Faisalabad-ah PTI worker ṭhahnem takin interior minister Rana Sanaullah chenna in chu lungin an tawng bawk a ni. Buaina chhuak vang hian Punjab province-ah emergency puan a ni a, dan leh thupek kengkawh turin Pakistani Rangers-te koh luh an ni bawk. 
Asif chuan PTI chungchang hi ngaihtuah mek ni mah se, thutlukna erawh siam a la ni lo tih a sawi. Sorkarin dan pawna hnawlna turin a rel a nih pawhin, Parliament-in a pawmpui a ngai ve leh dawn a ni.