Thailand inthlanah eptu pawlin hnehna chang

Thailand ram inthlanpui neih zawhah eptu pawl, Pita Limjaroenrat kaihhruai Move Forward Party (MFP) chu seat la hnem ber a ni.

Parliament lower house, House of Representatives- a seat 500 awmah MFP hian seat 151 an la a, Pheu Thai party-in a dawt. Result kimchang tihchhuah la ni lo mah se, eptu party pahnihte hian seat 286 an lak phak rin a ni. Rorellai, sipai sorkar thlawp United Thai Nation party erawh a che ṭha lo hle.

Eptu party-te hian hnehna chang mah se, Parliament dan hman mekah member 250 awmna, Senate chuan an ram prime minister thar tur hi an thlan phawt dawn a, hei vang hian sorkar thar an siam theih hun tur a la chiang lo.

Thailand Prime Minister thar ni tura beisei, MFP hotu Pita Limjaroenrat hi kum 42 mi niin, kum 2019-a Parliament member atana thlan a nih khan politics a luhchilh ve chauh a ni. Thanathorn Juangroongruangkit-a party, Future Forward Party aṭangin thlan tlin a ni a, mahse kum 2020-ah he party hi ṭhiah a ni a, Thanathorm chu MP a nihna hlihsak a nih hnuah, Move Forward Party hi dinin, hruaitu atan Pita hi ruat nghal a ni. Pita hi thusawi thiam tak niin, Thail Parlaiment-a 'rising star' ti tein sawi a ni. An party hi ṭhalai lamin an bawr hle.

Bangkok-a Thammasat University aṭangin finance-ah bachelor degree a zo a, Harvard University-ah public policy-ah master degree zoin, hemi hnu hian Massachusetss Institute of Technology aṭangin MBA a zo leh bawk. Sumdawnna lamah bul a ṭan hmasa a, a pa lo din rice bran oil company enkawlin, a hnuah transport and delivery app Grab Thailand executive director-ah a awm leh a ni.

Kum 2012-ah Thai TV actress Chutima Teepanat nen inneiin fanu an nei a, 2019-ah an inṭhen. Pita hian inthlan dawna a campaign-naah a fanu hi a hruai fo a, mipui lawm a hlawh hle.