Ram 100 chuangin Covid-19 chhuah dan chhui duh

Khawvel puma hri leng mek, Covid-19 chhuah dan chhui chian phutna resolution, Euro­pean Union-in a duan chu ram 100 chuangin an thlawp. 

Nimina World Health Assembly (WHO) mee­ting-ah EU draft reso­lution, Covid-19 chhuah dan chhui chianna leh he hri leng dona kawnga WHO hmalakna ennawn phutna chu putluh a ni. 

He resolution-ah hian he hri lo chhuahna leh, mihringa a darh chhoh dan kawngte chhui chian an phut thu tarlan a ni. Hri dona kawnga WHO hmalakna ennawn an phutna te pawh a tel bawk. Khawthlang ram ṭhenkhat, a bikin US chuan WHO-in hri leng do hna a kalpui dan hi an sawisel fo a ni. US president Donald Trump chuan China  lam aṭangah WHO puhin, fund an pek ṭhin pawh a tihtawp phah hial bawk. 

Covid-19 hmuh hma­sakna ber chu China rama Wuhan khawpuiah a ni. China chu hri leng chungchang hi a tir lamah zepah puh a ni a, ram dangah hnenah information pawh pe ṭha lohah puh a ni bawk. Mahse an puhna hi China chuan a pha thung a ni. 

Thla hlui khan Austra­lia ram chuan he hri chhui chianna kawngah independent inquiry neih a ngai tih sawiin, Australia foreign minister Marise Payne chuan "A huhoa kan chhui chian theih chuan ram hrang hrangte hri dona kawngah kan inlungrual tihna a ni ang. Kan hma lama hri lo darh leh tur pawh kan inven thiam phah thei tawh dawn a, mipui nunna kan chhanhim phah thei a ni," a ti.