US-in Space rocket kap chhuak

US Air Force chuan Pathianni khan X-37B space plane kengtu Atlas V rocket a kap chhuak a, an mission erawh an tarlang lo.

Rocket hi Cape Canavera aṭangin an kap chhuak a, Inrinnia kah chhuah tum tawh kha an ni a, mahse khua a ṭhat loh avangin Pathianni khan an kap chhuak ta zawk a ni.

Space thlawhtheihna rocket-in a kentel hi  Orbital Test Vehicle (OTV) tiin an sawi bawk a, hei hian orbit-ah satellite a dah dawn a, power-beaming technology-ah enchhin a ni dawn niin an sawi. He thlawhtheihna hi van boruakah ṭum ruk an kah chhuahna a ni tawh bawk.

X-37B hi classified programme niin a chung chang hriat tur a tam lo hle. Pentagon chuan an drone kah chhuahin a tih tur ber hi a puangzar mumal duh lo a, hun kal tawha a hnathawhte pawh an puangzar vak ngai lo.

Air Force secretary Barbara Barrett chuan thla tir lamah khan X-37B hian a hmaa an kah chhuah tawhte aia tam experiment a ti dawn tih a lo sawi tawh a, chubak chu a puangzar tam lo hle.

X-37B programme hi kum 1999 aṭang khan US hian a kalpui ṭan tawh a, Boeing siam niin orbit-a a awm laia 'power' a neihna tur hian solar panel a hmang a ni. Feet 29-a sei niin a thla pahnih inkar hi ft 15 a ni a, kg 4,989-a rit niin runway-ah a ṭum thei. 

Kum 2010 April khan a ṭum khatna turin an kap chhuak a, thla riat hnuah kir lehin a mission hnuhnung ber chu nikum October khan a zo a, hemi ṭum hian ni 780 orbit-ah a awm a ni. Tunah hian eng chena rei nge vansangah a thang dawn tih hriat a la ni lo.