Peru-in Amazon-ah Covid-19 hospital sak tum

Peru sorkar chuan an ram huam chhunga Amazon ramngawah Covid-19 kaite enkawlna tur damdawi-in sak a nih tur thu tarlangin, kar thum chhunga zawh hman an tum. 

Peru khawpui zinga a lian ber pawl, Iquitos khuaa damdawi-inah te chuan Covid-19 kai enkawl an tam tawh avangin damlote awmna tur an indaih tawh lo a, hei vang hian damdawi-in hi sak belh a tum a ni. Peru hi Covid-19 kai tamna ram 12-na a ni mek. 

Amazon ramngaw huam china Brazil nena an inrinna bul, Ucayali khawpui Pucallpa khuaah damdawi-in hi sak belh tum a ni a, state social security body, EsSalud chuan khum 100 awmna tur an sak dawn thu a tarlang. Helai hmunah hian healthcare worker 220-te chu tirhluh an ni dawn a, prime minister Gustavo Zeballos chuan dam lote enkawlna tur oxygen, damdawi leh mamawh ṭul dang chu dah a nih tur thu a sawi.

Peru-a Amazon ramngaw huam chin khuaahte hian kawng a ṭhat tawk loh avangin, heng laia khawsate ṭanpuina turah harsatna a awm ṭhin a, hei vang hian Peru khawpui Lima aṭangin thlawhtheihna hmangin ṭanpuina hna chu kalpui a ni dawn tih sorkar chuan a tarlang. 

Iquitos khuaa Covid-19 enkawlte chu oxygen tlakchham avanga thi an awm tih hriat a ni a, hei vang hian Iquitos-ah hian sorkar chuan oxygen bakah thil ṭuldang mamawhte thawn luh a tum a ni. 

Peru-ah hian Covid-19 hri kai hi mi 92,273 an awm tawh a, heng zinga mi 28,621-te chu enkawl dam an ni tawh a, he hri vanga thi hi mi 2,648 an awm tawh bawk.