Israel ṭangrual sorkar thar lalut

Israel prime minister Benjamin Netanyahu kaihhruai ṭangrual sorkar thar chu Pathianni khan lakluh a ni ta. 

April thlaa Likud party hotu Netanyahu leh Blue and White party hotu Benny Gantz-ten inremna an lo siam tawh angin thuneihna insemin ṭangrual sorkar hi siam a ni.

Netanyahu hian thla 18 chhung PM dinhmun hi a chelh dawn a, Gantz chu depty PM a ni ang. Thla 18 hnuah Gantz hi PM-ah a awm ve thung dawn a ni. 

Sorkar tharah hian party pahnihte hian ministry chanpual pawh a zatin an insem a, an thawhpui party tenau zawkte telh an duh avangin minister zat pawh ṭum dangin aiin tihtam a ni. Hei hian sorkar sum sen pawh kum khatah dollar maktaduai 225 velin a tihpun phah dawn nia sawi a ni a, eptu pawlte sawisel an hlawh phah hle. 

Hruaitu pahnihte chuan coronavirus leng vanga an ram economy dinhmun tlahniam siamṭhat chu sorkar tharin a ngaih pawimawh hmasak ber tur a nih thu an sawi. 

Hri leng vanga inkharkhipna kalpui vangin hnathawhna hmun tam zawk khar a ni a, hei vang hian mi tam takin hna an chan tawh a ni. Khuahkhirhna hi thlahdul ṭan a ni tawh a, school leh hanthawhna hmun ṭhenkhat chu hawn a ni a, mahse an ram economy dinhmun erawh a la ṭha lo hle.