Khawvelah Covid-19 kai thar 54,900 an awm

Khawvela hripui leng mek, Covid-19 kai thar chu Pathianni khan mi 54,900 an awm a, hemi ni vek hian hri kai zinga mi 2,260 in an thihpui bawk a ni. 

Covid-19 kai hi khaw­vel pumah mi 47,71,910 an awm tawh a, an zinga 3,15,170 in an thihpui laiin enkawl dam mi 18,44,030 an awm tawh bawk. 

US chu hri kai tamna leh hri vanga thi tamna ber ram a la ni chhunzawm zel. Pathianni khan an ramah hri kai thar mi 7,530 an awm a, Covid-19 kai hi  15,15,310 tling tawhin mi 90,332 in an thihpui tawh a ni. 

Russia-ah hri kai hi an la pung chak hle a, hri kai tamna ram pahnihna a ni tawh a ni. Pathianni bikah khan Russia ramah hri kai thar mi 9,700 an awm a, hri kai zat hriat tawh hi mi  2,81,750 an tling tawh. 

Spain-ah hri kai thar mi 1,210 awmin Covid-19 kai awm zat hi 2,77,710 an ni tawh a, UK-ah mi 3,142 in kai tharin hri kai awm zat hi 2,43,300 an tling tawh bawk. 

Brazil ramah coronavirus kai an pun chak avangin an damdawiinte pawh a tawt chak hle. An rama khawpui lian ber, Sao Paulo mayor chuan hri kai enkawl tur an pun chak avangin rei lo teah khawpui chhunga damdawiinte chu an khat vek thei dawn niin a sawi. 

Sao Paulo hi Brazil rama hri kai tuar nasa ber zinga mi niin, mi 3,000 chuangin an thihpui tawh a ni. Mayor  Bruno Covas chuan mipuiten lockdown rule an zawm ṭhat duh loh avangin hri kai hi an pung chak tih a sawi bawk. 

Pathianni thleng khan Brazil-ah hian hri kai hi 24,100 an awm tawh a, hri kai awm tam lamah Spain leh Italy te an pel tawh a, khawvel hri kai awm tamna ram palina a ni tawh a ni. Health expert-te chuan test an neih tam tawk loh avangin official record-a hri kai zat tarlan aiin a takah hri kai hi an la tam zawk hle an ring tih an sawi a ni. 

Europe ram tam zawkte chuan hri leng vanga khuahkhirhna an siamte chu nimin aṭang khan an thlahdul ṭan. Italy-ah chuan bar, salon leh restaurant-te  hawn phalsak an ni tawh. Thla hnih chuang zet kharkhipna kalpui a nih hnuah sumdawnna hmunte hawn ṭan a ni a, hemi rual hian hri darh zel tura laka invenna turin social distancing dan chu hman chhunzawm zel a ni. 

Italy-ah hian biakin te pawh hawn an ni tawh dawn a, mass pawh buatsaih a ni thei tawh dawn a ni. Mahse biakina inkhawmte chu inhlat taka awm tur leh, face mask hmang vek tura tih an ni. Vatican-a St Peter's Basilica chu mipui tlawh theih turin hawn a ni bawk a, mahse he hmun tlawhte chu bithliah chin siam an nih bakah an luh hmain an temperature-te endik sak vek an ni bawk. 

Spain pawhin khuahkhirhna a thlahdul ṭan tawh a, dawrte te hawn phalsak niin  mi 10 chin inhmuhkhawm phal a ni bawk. Hemi rual hian sorkar chuan ram pumah vantlang hmunah hmai tuamna (face mask) chu hman ngei ngei turin thupek a siam dawn. Health minister Salvador Illa chuan thupek hi tihchhuah a ni thuai dawn tih sawiin, hei hi an rama hri leng thawh hnihna a thlen palh tur venna atana thil pawimawh a nih thu a sawi. Health expert-te chuan hmai tuamna hman chu hri laka invenna pawimawh tak a nih rualin, a ṭha ber chu midang nena inhlata awm leh social distancing dan hman ṭhat chu a ni, an ti. 

Belgium pawhin nimin aṭang khan primary leh secondary school-te a hawng ṭan a, museum leh zoo-te pawh hawn an ni bawk. Mahse heng hmun tlawh turte tan online chauhin ticket lak theih a ni a, kal thei zat pawh bithliah siam a la ni bawk. 

Greece-ah pawh school hawn ṭan a ni a, Portugal-ah restaurant, cafe leh pastry dawrte hawn an ni. Poland sorkarin beauty salon, restaurant leh cafe-te hawn a phalsak ṭan bawk a ni. 

Hri lenna ram tam zawkah invenna atana face mask hmang turin mipuite hriattir an ni a, ram ṭhenkhat phei chuan pawnchhuahnaah hmang ngei ngei tura thupek siamin a hmang lo te  hremna te pawh an siam hial. Hetihlai hian World Health Organisation (WHO) chu hri len tirh lama mask hman chung changa a ngaihdan a siamah a dinna ngaiah a la ding reng thung.

WHO chuan face mask chu mi hrisel ṭha pangngai tan chuan damlo, hri kai nia rinhlelh an enkawlna leh, an khuh leh hahchhiau a nih loh chuan hman a ngai lo tiin a sawi. Mask hman hi kut fai taka sil ziah a, hand sanitizer te hman zui a nih chauhin awmzia a nei niin a sawi a ni.