Hmarchhak bialah kar hnih chhungin Covid-19 kai 61 aṭangin 286-ah pung

Hmarchhak bial­ah kar hnih liam ta chhungin Covid-19 kai an pung chak hle. May 1 khan hmar­chhak state pariat zingah parukah hri kai hi mi 61 an awm a, mahse May 17-ah chuan hri kai hi 286 an awm tling tawh. 

Tripura-a Border Security Force (BSF) batallion pahniha sipai leh an chhungte zingah hri kai hmuh belh tam tak an awm avang leh, Assam-ah kai thar an awm ve reng avangin hmarchhakah hri kai hi an pung chak a ni. 

Assam health minister Himanta Biswa Sarma leh Manipur health official-te chuan an hmun dang aṭanga hawte zingah hri kai thar hi hmuh belh an ni tih an sawi. Hetih lai hian hmarchhak state dang Sikkim leh Naga­land-ah chuan hri kai hi hmuh an ni lo a, Arunachal Pradesh leh Mizoram-ah hri kai hmuhte chu enkawl dam an ni tawh bawk. 

May 1 khan Assam-ah Covid-19 positive hi mi 42 awmin mi pakhatin a thihpui a, hmarchhak state zingah hri kai tamna ber an ni. Mahse May 17-ah chuan Tripura chu hri kai tamna ber state niin mi 167 an awm tawh a, an zinga 101 chu enkawl mek an ni. Assam-ah nimin khan hri kai pali hmuh belh lehin an vaiin  mi 104 hmuh an ni tawh a ni.

Meghalaya-ah 13 awmin, pakhatin a thihpui tawh a, pakhat enkawl mek niin midang erawh chu an dam tawh a ni. Manipur-ah hri kai pasarih hmuh an ni tawh a, an zinga panga chu enkawl mek an ni bawk a ni. 

Mi maktaduai 45.58 awmna (2011 census), hmar­chhak bialah hian lockdown avanga hmun danga tang­khangte hruai haw mek an ni. Rel, bus leh motor dang hmangin hmarchhak state hrang hrangte chuan an mi leh sa tangkhangte an hruai haw mek a, hruai haw zingah hian hri leng hluarna red zone amite pawh an tel a, hei vang hian hri kai an pun belh hlauhthawnna pawh a nasa hle. Assam leh Manipur-a hri kai hmuh tharte hi hmun danga tangkhang  hawte an ni. 

Hmarchhak bialah hian testing facility a tam tawk lo a, health infrastructure te a ṭha tawk lo a, communication system te a ṭhat tawk loh avangin thuneitute lam tan pawh hmalak chak a harsa nia sawi a ni.