Pakistan police-in PM hlui Imran Khan lakah terrorism case ziaklut

Pakistan police-te chuan nimin khan an ram prime minister hlui, Imran Khan leh a party, Pakistan Tehreek-e-Insaf (PTI) hruaitu 10 chuangte chu judicial complex pawna pawikhawihnaa inhnamhnawiha puhin, an lakah terrorism case an ziaklut.

Inrinni liam ta khan Imran Khan hi Tosakhana case siamsak a nih chungchanga hearing nei turin Lahore aṭangin Islamabad-ah a kal a, Islamabad Judicial Complex pawnah PTI member-te hian buaina siamin, bungruate an suasam bakah security mi leh sate an bei tel bawk.

Judicial Complex pawna buaina chhuakah hian security mi 25 velin hliam an tuar a, buaina chhuak vang hian additional district and sessions judge Zafar Iqbal chuan hearing neih tur chu March 30-ah a sawn phah bawk a ni.

Imran Khan-a'n Lahore-a a in a chhuahsan hnu hian Punjab police 10,000 chuangin a chenna in, Zamam Park residence hi hual nghalinmain gate leh bangte an tihchhiat hnuah, a in hi an dap zui a ni. In chhunga awm, PTI worker-te nena innawr zuiin, buaina nasa tak a chhuak a, PTI worker 10-in hliam an tuar.

PTI leader Fawad Chaudhry chuan dan kalha Khan-a chenna in dap a, tharum thawhna thlentu police officer-te lakah hian case thehluh an tum tih a sawi.