Israel leh Palestinian Authority official-te inhmu

Israel leh Palestinian Autho­rity (PA) official-te chu nimin khan Egypt-ah+ meeting an nei.

Meeting hi Sharm el-Sheikh resort city-ah neih a ni a, Egypt, US leh Jordan official-te an telpui a ni.

Muslim-te thla thianghlim, Ramadan chu tun kar Ningani aṭang hian neih ṭan ani dawn a, hei vang hian he hun pawimawh hman chhunga Israel-in Palestinian ram a luahsak chhunga Israel sipai leh Palestinian mite inkara boruak ṭha leh muanawm a awm theihna turin inbiakna hi an nei a ni.

Hetih lai hian PA-a rorellai, Fatah ni lo Palestinian political party lian dangte chuan Israel aiawhte nena inbiakna neih hi duh loin, an boycott thung. Gaza Strip-a roreltu, Hamas chuan Sharm al-Sheikh-a meeting neih hi an pawm ve lo tih an sawi. Hamas thupuangtu, Mousa Abu Marzouq chuan Europe leh America thuneitute chuan dan loin Israel-in Palestinian ram a luahsak tih sawi ṭhin mah se, Israel thiltih dang tur hian hma an la ngai lo a ni, a ti.

Israel hian kum 1967-a Palestinian ram a luahsak hnuah, a ram luah West Bank, Gaza Strip leh East Jerusalem-ah hian Juda-te chenna tur leh outpost-te siamin, Israel mi nuai sarih vel an cheng mek a ni.