ICC-in Vladimir Putin manna tur thupek a tichhuak
International Criminal Court (ICC) chuan Inrinni liam ta khan Russia president Vladimir Putin chu war crime chungchang leh, dan loa Ukraine aṭanga naupangte thawnchhuakah puhna kaihhnawihah manna tur thupek a tichhuak.
ICC prosecutor Karim Khan chuan Putin hi ICC member ram 120-ah, eng court-ah pawh kal se man theih a ni vek tih a sawi. Mahse Russia hi ICC member a nih ve loh avangin, Putin chungah hian eng ang takin nge hma an lak zui theih dawn erawh a chiang lo. Hei bakah ICC hian kum 20 chuang chhungin thubuai a siamsak zingah panga chiah thiam loh a la chantir a, hengte pawh hi ram khat hotu lu, top official an ni lo.
The Hague, Netherlands-a awm, ICC chuan President Putin bakah Russia presidential commissioner for children's rights, Maria Lvova-Belova manna tur thupek pawh a tichhuak tel bawk.
Putin leh Lvova-Belova te hi dan loa Ukraine mite, a bikin naupangte, anmahni ram ngei aṭanga thawnchhuakah puh a ni. United Nations Commission of Inquiry report chuan naupang an thawnchhuah zinga ṭhenkhat chu Russia khua leh tui nih luihtirin, anmahni enkawltu tur chhungkua pawh thlan an ni a, heng chhungkua te bulah hian khawsain Russia ramah hian an awm ngheh zui a ngai a ni, a ti. UN-in a tarlan danin, Russia in tihluihna hmanga naupang a lakluh hi 16,221 an ni.