China Defence Minister atan US-in a hrek mek General Li Shangru ruat

China chuan nimin khan an ram defence ministe thar atan general Li Shangfu a ruat.

General Shangfu hi Russia rama ralthuam siamtu lian, Rosoboronexport hnen aṭanga combat aircraft leh ralthuam dang leia puh chungchangah, kum 2018 aṭang khan US-in hrekna a lo siam tawh a ni.

China premier Li Qiang-a'n defence minister atana Li Shangfu a rawtna chu nimin khan parliament, National People's Congress chuan a pawm a ni. Li hian Wei Fenghe a thlak dawn a ni.

Kum 63 mi, defence minister thar Li Shangfu hi an ram sipai, People's Liberation Army's (PLA) thuam chakna leh hmasawnna kawnga mi pawimawh tak a ni. Aerospace engineer niin China satellite programme-ah a thawk ṭhin. Kum 2016 khan China-in space leh cyber warfare lama tihhmasawn hna thawk tura a ruat, PLA-a Stra­tegic Support Force deputy comman­der-ah ruat a ni. Hemi hnu hian Central Military Commission (CMC)-a Equip­ment Development Department hotuah dah a ni zui leh bawk.

Li hian Equip­ment Development Department hotu a nih lai, kum 2017 khan Russia aṭangin Su-35 combat aircraft 10 leh Su-400 surface-to-air missile system hmanruate leiin an lalut a, hei vang hian kum 2018 khan US chuan Li hrekna hi siamin, tun thlengin he hrekna hi hman zui a la ni.

National People's Congress chuan defence minister thar bakah, premier Li Qiang-a'n vice premier atana a ruat mi pali - Ding Xuexiang, He Lifeng, Zhang Guoqing leh Liu Guozhong-te a pawm bawk.