Turkey-a lirnghingin a thil tihchhiat USD tld 100 chuang hu tling : UN agency

United Nations Development Progamme chuan February 6-a Turkey rama lirnghingin chhiatna rapthlak tak a thlena thil a tihchhiat hlut zawng chu USD tluklehdingawn 100 chuang hu a tling tih a sawi.

UNDP official, Louisa Vinton chuan nimin khan press conference a neihah hei hi sawiin, "Turkey sorkar leh a thawhpui ramdangten lirnghingin thil a tihchhiat hrang hrangte an chhutna aṭangin, thil chhia hlut zawng hi USD tld 100 chuang hu a tling tawh a ni," tiin hei hi March 16-a Brussels, Belgium-a Turkey leh Syria tana donor conference neih turah pawh behchhanah an hmang dawn tih a sawi bawk.

Turkey leh Syria rama magnitude 7.8-a naa lirnghingin chhiatna a thlena thi hi mi 52,800 chuang niin, heng zinga mi 46,100 chu Turkey rama mi niin, Syria ramah mi 6,700 vel an thi nia sawi a ni. He lirnghing hian Turkey rama cheng zinga 16% vel a nghawng a, mi maktaduai 1.5 vel chenna nei loin an awm phah niin UN chuan a sawi.

Lirnghing na tak a thlen aṭanga thla khat hnuah, nimin thleng khan mi tam tak chu khawsakna mumal nei loin an la awm a, heng mite chhawmdawlna tur hian USD tld 1 chu hmanhmawh taka mamawh a nih thu United Nations official chuan a sawi. Lirnghing tuarte awm lailawk tirna hmunte hi a thianghlim tawk loh avangin hrite a leng tih an sawi a, puan-in (tent) chu mamawh belh zel a la ni, an ti.