Myanmar ram dinhmun a chhe zual zel : UN

United Nations special envoy, Noeleen Heyzer chuan Myanmar sipaite Kachin state an bomb avanga mi 80 thihna thleng chu a dem thu sawiin, sipai rorelna hnuaiah Myanmar ram mipuite dinhmun a chhe zual zel tih a sawi.

Thawhlehnia UN General Assembly-a human rights committee hmaah Heyzer chuan Myanmar chungchang hi report-in, mi maktaduai 13.2 chuang chu an duhkhawp ei tur nei loin an awm mek a, mi maktaduai 1.3 chu an chenna hmun aṭangin himna zawngin an tlanchhe tawh bawk a ni, a ti. Hetih lai hian sipaite chuan civil mite hi a beih chhunzawm reng a, chenna in leh building dangte halsakin, civil mite an la that zel a ni, a ti.

Heyzer hian August thla khan Myanmar hi a tlawh a, sipai hotu lu ber senior general Min Aung Hlaing pawh a hmu a ni.

Myanmar ramah sipai rorelna dodalna hi lantir chhunzawm reng a la nih thu Heyzer chuan a sawi a, mipuite chuan sipai sorkar chu pawm an tum lo a ni, a ti. Civil mite leh an chenna beih a ni ṭhin chu titawp turin Myanmar sipai hotu hnenah pawh ngenna a siam thu a sawi bawk.