Ukraine raltlante Nipui hma chu an rama kir lo turin ngen
Ukraine sorkar chuan indona avanga an ram mi, ram danga raltlan mekte chu nipui hma chu Ukraine-ah kir rih lo turin a ngen.
Deputy prime minister Iryna Vereshchuk chuan Russia in a beihna avangin energy system lamah harsatna an tawk a, thlasik lo thleng turah energy mamawh a na zual dawn bawk avangin, an phurrit chhawk zangkhaina turin raltlante nipui hma chu kir lo turin a ngen a ni. "Thlasik kan tuarchhuah a ngai a ni," a ti.
President Volodymyr Zelenskyy chuan Russia-in an energy sector hmun thuma ṭhena hmun khat aia tam a kahchhiat sak thu a sawi.
Deputy PM Vereshchuk-i chuan Ukraine mi tlanchhiate chu an ramah kir thei tawh se tih an duh rualin, an harsatna a belhchhah dawn avangin tunah chuan an tlanchhiatna rama an la awm chhunzawm theih chu a ngai a ni, a ti. Kumin February thlaa Russia-in Ukraine a do aṭang khan, Ukraine mi maktaduai 7.7 vel chu Europe ram hrang hrangah an tlanchhe tawh niin UN refugee agency chuan a tarlang.
Indona avang hian Ukraine economy pawhin a tuar nasa tawh hle. President Zelenskyy chuan nakkum atana budget indaih lohna an rin chu USD tld 38 vel a tling dawn nia sawiin, ram dagnte chu pui turin a lo sawm tawh bawk.
International Monetary Fund (IMF) chuan Ukraine hian inenkawlna leh an dinhmun siamṭhatna turin nakkum hian thla tin USD tld 3 zel a mamawh dawn niin a sawi a, Russia-in a bomb chhunzawm zel a nih phei chuan USD tld 5 zel a mamawh dawn tih a sawi.
Russia-in a luah, Crimea bial leh Russia ram inkalpawhna lei awmchhun kahchhiat a nih hnuah, Russia hian Ukraine energy network lam chu nasa zawkin a bei let mek a ni.