Kamala Harris-in South Korea-a Demilitarised Zone tlawh dawn

US vice president Kamala Harris chuan kar tawpa South Korea-a tlawh pahin Demilitarized Zone a tlawh nghal dawn tih White House chuan nimin khan a sawi.

Japan prime minister hlui Shinzo Abe vuina huna tel tura Japan-a zin, Harris hian naktukah DMZ hi a tlawh dawn tih White House chuan a tarlang. Hei hian North Korea lam a tithinur hle tura ngaih a ni a, kumin August thlaa DMZ tlawhtu, US House Speaker Nancy Pelosi chu "Khawvel ralmuanna tichhe nasa ber tu" tiin NKorea chuan a sawi a ni.

South Korea prime minister Han Duck-soo chuan nimin khan Harris nen inbiakna hun an hman ṭumin, US Vice President-in DMZ a tlawh chu Korean Peninsula-a venhimna leh muanna a awm theihna tura an inpekna tilangtu a ni dawn a ni, a ti.

North Korea hian kumin­ah ringawt ralthuam ṭhahnem tak enchhinna a nei tawh a, heng zingah kum 2017 hnua a vawi khatna ni turin intercontinental ballistic missile full range an kapchhuak a ni. US leh SKorea official-te chuan North Korea hian a vawi sarihna turin nuclear test an nei leh dawn tih an sawi a, an kaltlangpui a nih chuan United States chuan rang leh na thei ang bera chhanlet an tum thu a sawi.