Putin-a'n US mi Snowden hnenah Russia khua leh tui nihna a pe
Russia president Vladimir Putin chuan United States security contractor hlui Edward Snowden hnenah Russia khua leh tui nihna a pe.
Thawhṭannia Russia sorkar official website-in ram dang mi, khua leh tui nihna an pek 75 a tarlan zingah Snowden hi a tel a ni.
US National Security Agency tana contractor hna thawk ṭhin, kum 39 mi Snowden hi sorkar surveillance programme lama document pawimawh tiputrua puh a nih avangin kum 2013 khan US chhuahsanin Russia-ah hian a tlanchhia a ni. Kum 2020 khan Russia chuan an rama awm ngheh phalna a lo pe tawh a, hemi ṭum hian US citizenship titawp loa Russia khua leh tui nihna dil a tum thu a sawi zui a ni.
"Ka chhungte lak aṭanga kum tam tak ka awm hran hnuah, kei leh ka nupui chuan kan fate lak aṭanga inlakhran chakna kan nei tawh lo. Kum hnih dawn kan nghah hnu leh, kum 10 dawn ka awmbo hnuah, kan dinhmun hi chhete tala kan insiamrem theih chuan kan chhungkaw tan chuan danglamna nasa tak a thlen thei dawn a ni. An tan leh kan vaia tan zalenna kan neih theihnan ka ṭawngṭai reng a ni," tiin Snowden chuan Thawhṭanni khan Twitter-ah a sawi.
US thuneitute chuan Snowden hi US-a let a, enthlatua puh a nih chung changah a thubuai hmachhawn tir an duh reng thung.
Russia-Ukriane indona thleng meka US leh Russia inkar boruak a chhiat zual chhoh mek laiin, Russia President chuan US-in an ram enthlatua a puh Snowden hnena khua leh tui nihna a pek hian ram pahnih inkar boruak pawh a tihchhiat lehzual rin a ni.
Snowden-a lawyer, Anatoly Kucherena chuan contractor hlui nupui America mi vek, Lindsay Mills, Russia-a a pasal kianga khawsa mek pawhin Russian passport a dil dawn niin a sawi.
Snowden hi Russia-a a awm hnuah mipui hmuhah a inlan tlem hle a, social media kaltlangin Russia sorkar kalphung a sawisel fo tawh a, kum 2019 khan a thubuai dik taka ngaihtuah a nih dawn chuan US-ah let leh a hreh loh thu a lo sawi tawh a ni.
Russia spy hotu hlui, Putin chuan kum 2017 khan Snowden-a'n US sorkar thuruk a tichhuak chu a dik lo a, mahse ram phatsantu erawh a ni lo, tiin a sawi.