Virus len thu sawichhuak hmasatu China doctor thi ta chhui chiang dawn

China rama corona­virus leng chungchang sawichhuak hmasa tu leh, a thusawi avanga thu­neituten an vau nia sawi Dr Li Wenliang chu nimin zing khan Wuhan Central Hospital-ah coronavirus vangin a thi. 

Dr Wenliang (34) thih vang leh, China sorkarin an rama hri leng mek a buaipui danah mipuiten an lungawi lohna an auchhuahpui nasa hle. Hei vang hian anti-graft watchdog chuan Wuhan-ah  Dr Wenliang chanchin leh a thihdan chhui chiang turin team a tir dawn tih a sawi. 

Nikum December thla khan SARS lam chi virus hmuh a nih thu  social media-a an sawi avangin Li leh physician dang pasarihte chu thu dik tawk lo thehdarhah puhin Wuhan police-te chuan an hrem a ni. January 3 khan Dr Wenliang hi mipui  tiphawklek zawngin thu a thehdarh tiin a hming ziah luihtir a ni a, thubuai siamsakah vau zui a ni bawk. Wenliang hian Wuhan damdawi-inah a hna a thawh chhunzawm hnuin, January 10 khan khawsik leh khuh neiin, February 1 khan novel coronavirus a kai tih amah ngeiin a sawichiang ta a ni. 

China supreme court pawh­in Wuhan police-te thiltih hi a lo sawisel tawh bawk a, a thusawite hi lo  ngai pawimawh hmasa ni se coronavirus leng mek chu tun ang em em hian a nasa lo maithei niin a sawi. 

China mipui tam tak chuan  social media-ah Dr Wenliang an ui thu leh, hero ang hiala an ngaih thu te sawiin, hri leng chungchanga thuneitute hma  lak dan an duhkhawp loh thu an sawichhuak nasa hle. 

Novel coronavirus leng vang hian nimin thleng khan mi 636 an thi tawh a, China ram bikah pawh he hri kai zat hi mi 31,161 an tling tawh bawk.