Hamas thuneitute'n Gaza-ah Palestinian mi 5 tihlum

Gaza Strip-a rorellai, Hamas Islamist-te chuan nimin khan Palestinian mi panga chu an tihlum a, an zinga pahnih chu kum 2015 leh 2009-a Israel tana enthlatua puha thubuai siamsak an ni tih Interior Ministry chuan a sawi.

An tihhlumte hi an khaihlum nge, firing squad-ten an kaphlum tih sawichian a ni lo a, kum 2017 hnua Palestinian territory-a tang tihhlum a thlenna hmasa ber a ni.

Interior Ministry chuan nimina tihhlumte hming hi a puangzar lo a, mi pathum chu tualthat thubuaia thiam loh chantir leh, mi pahnih chu Palestinian mite thah an nih theihna atana Israel hnena information pe ṭhin an ni tih chauh a sawilang.

"Dan hmanga kenkawh ngaite tihfel a nih hnuah tihhlumna hi kalpui chauh a ni. Thutlukna tawp a ni a, tihhlawhtlin ngei tur a ni bawk, thubuai neite hi khinletna hun pek vek an ni bawk," tiin Ministry chuan a sawi.

Palestinian leh international human rights group chuan thi tura hremna pek ṭhin hi an sawisel fo a, Hamas leh Palestinian Authority hnenah pawh he dan hi titawp turin an lo ngen tawh a ni.

Palestinian law chuan thi tura hremna pek chungchangah thutlukna siamtu chu President Mahmoud Abbas a nih thu a tarlang a, mahse Abbas hian Gaza lamah hian thu a nei lo thung.

Kum 2007-a Hamas Islamist-ten Abbas kut aṭanga Gaza Strip an lak hnuah, court-te chuan Palestinian mi eng emaw zat chu thi tura hremna an lo pe tawh a, an zinga mi 27 chu tihhlum an ni tawh tih human rights group-te chuan a tarlang.