Pakistan tuilian vangin mi 1,300 dawn thi tawh

Pakistan-a tuilian rapthlak tak thleng vanga thi chu mi 1,300 dawn an tling tawh, an ram hmun tam tak chu tuiin a la chim mek.

Pakistan sorkar hnuaia agency leh private NGO-te chuan tuilian tuarte chhawmdawl hna an thawh chhunzawm zel. Tuilian hian chenna in 14,68,019 a tichhe tawh a, ranvulh 7,36,459 an thi tawh bawk. Balochistan, Khyber Pakhtunkhwa, Punjab leh Sindh province-te chu tuilian tuar nasa zual an ni. Heng province paliah hian mi nuai nga chuang chu relief camp-ah an khawsa mek a ni.

Tuilianin a tihchhiat hlut zawng hi USD tlukleh­dingawn 10 anga chhut ni mah se, international organisation dangte nen la zirchian chhunzawm mek a ni.

Ram eng emaw zat aṭangin ṭanpuina an dawng a, nimin zing khan France ram aṭangin chhawmdawlna phurtu thlawhtheihna chuan Islamabad a thleng.

Federal Minister of Poverty alleviation and Social Safety Shazia Mari chuan chhungkaw 7,23,919-te chuan chhawmdawlna, Rs 25,000 ṭheuh an dawng tawh tih sawiin, Rs tld 18.25 semchhuah a ni tawh tih a sawi. Tuilian hian Pakistan ram hmun thuma ṭhena hmun khat a chim mek a, mi maktaduai 33 chuang a nghawng a ni.