Myanmar sipai hotu-in Russia tlawh dawn

Myanmar-a sipai sorkara hotu, Senior General Min Aung Hlaing chuan tunkar hian economy lama inbiakna nei turin Russia a tlawh dawn. Russia leh Myanmar sorkarte hi sipai chakna hmanga tharum an thawhdanah enhran an ni mek a ni.

Min Aung Hlaing hi Russia khawchhak lam, Vladivostok khawpuia neih tur, Eastern Economic Forum-ah a tel dawn tih Global New Light of Myanmar newspaper chuan a tarlang. China, India, Japan, Kazakhstan leh ram dang te pawhin he hunah hian an tel ang.

General hian Russia sorkar official-te chu thawhdunna nghet zawk an neih chhunzawm zel theihnan leh, ram pahnih economy leh sorkar inkara ṭhianṭhatna chu chhawm nun zel dan a sawipui dawn niin report chuan a tarlang.

Sipai chakna hmanga nikum February 1-a Aung San Suu Kyi kaihhruai civil sorkar an paihthlak hnuah Myanmar hian khawthlang ram aṭanga hrekna a tawk a, an inlaichinnate pawh a chhiat phah hle a ni.

November thlaa Cambodia khawpui, Phnom Penh-a Association of Southeast Asian Nations (ASEAN) leaders’ summit neih turah Min Aung Hlaing hi sawm a nih a rinawm loh a, tualchhung politics buaina tiziaawm zawnga hma a lak ṭhat tawk loh avangin bloc hi an lungawi lo hle.

Sipaiten thuneihna an chan hnuah Myanmar ramah tualchhung buaina hi a la thleng reng a,sipai leh sipai sorkar dodaltute inkara buaina chhuak vang hian mi 2,200 chuang an thi tawh.

Russia pawh hian kumin February 24-a Ukraine a run aṭang khan ram dang aṭangin hrekna hrang hrang a tawk ve bawk. Myanmar sipai hotute chuan Russia thawhdunna thuk zawk siam tumin hma an la chho a, kumin July thla pawh khan General Hlaing hian a mimal thil nia sawiin Russia a lo tlawh tawh a ni. Hemi ṭum hian Russia space agency Roscosmos leh nuclear agency official-te a hmu nia sawi a ni a, August thla khan a thachhang dawltu, Soe Win pawhin Russia hi a tlawh bawk a ni.