Sri Lanka damdawi-in lian ber sum lamah a tlachhia ; Damlo zai titawp, damlote enkawlna awm loh vangin an chhuak

Sri Lanka-a damdawi-in lian ,National Hospital chu sum lamah a tlachhia a, ward tam zawk chu a ruak tawh a, damlo ṭhenkhat la awmte pawh enkawl lohin an awm mek. Doctor-te chu damdawi-inah hian an kal thei tawh lo.

National hospital hi an ram chhung hmun hrang hranga specialist treatment lak ngaite pan khawm ṭhin a ni a, mahse tunah damlo enkawlna tur an neih mumal tawh loh avangin damdawi-in khum 3,400 zinga a tam zawk chu a ruak tawh a, staff pawh tlemte chauh an kal tawh bawk.

Inzaina hmanrua leh damdawi an neihsate an hmang zo thawkhat tawh a, hmanraw leina tur sum an nei tawh lo. Damlo leh doctor-te pawhin ram chhunga petrol indaih lohna thleng mek avangin damdawi-in hi an pan thei tawh lo.

Sri Lanka hian damdawi leh damdawi lam hmanrua a mamawh 85% hi ram pawn aṭanga a lakluh a ni a, damdawi siamna hmanrua, raw material pawh a lalut bawk. Mahse an ram economy a tlakchhiat avangin ram pawn aṭangin bungrua a lalut thei tawh lo a ni. An mamawh ang petrol pawh an nei thei tawh lo a, damlo enkawlna tur damdawi pawh an nei mumal tawh lo a ni.

Health ministry official-te chuan an ram public health service dinhmun dik tak an sawichiang duh lo. Mahse sorkar damdawi-ina doctor-te chuan dan pangngaia mi an zai ṭhinte chu titawp tir an nih thu leh, dinhmun ṭha lo taka dingte chauh zai rih turin tih an nih thu an sawi.

"Sri Lanka healthcare system ṭha tak ṭhin kha tluchhe mai thei dinhmunah a ding a ni. Na tuar mekte chuan a nghawng an tuar na ber dawn a ni," tiin UN resident coordinator Hanaa Singer-Hamdy chuan a sawi a ni.

World Bank chuan Sri Lanka-in damdawi a mamawh rang taka a lei theihna turin development fund a pe dawn tih a sawi. India, Bangladesh, Japan leh ramdangte pawhin healthcare sector ṭanpuina hi an pe tawh a, ram pawna Sri Lanka mi khawsate chuan damdawi leh damdawi lam hmanruate an thawn lut bawk.

President thar Ranil Wickremesinghe chuan an ram economy lama buaina hian nakkum kum tawp thleng a la awh chhoh a rinawm thu a sawi. Hei vang hian Sri Lanka chu public health lamah buaina thuk leh nasa zawk hmachhawn thei dinhmunah a ding mek a ni.

Thil man sang chak tak avangin chhungkaw tam tak chuan ei tur leina pawh an nei ṭhaṭhum tawh lo. World Food Programme chuan , mi maktaduai nga dawn, an ram mipui aṭanga 22% te chu ei tura chhawmdawl ngai an ni tawh a, chhungkaw paruk zinga panga vel chuan an ei zat te an tihtlem bakah, ei tur quality pawh a tlawm zawk an lei tawh a ni, a ti.

He an buaina hi a reh mai loh chuan nausen tam tak an thih phah ang a, ram pumah taksa mamawh chaw ṭha tlakchhamna a thleng dawn bawk a ni tiin medical officer's assocation hruaitu Dr Vasan chuan a sawi.