Nuclear ralthuam nei ramte'n ralthuam manah USD tld 82.4 seng
Khawvela nuclear ralthuam nei ram pakuate chuan kum 2021 chhungin an ralthuam thawmṭhatna atan USD tluklehdingawn 82.4 an seng niin campaign group chuan a puang.
Heng ram zingah hian United States chuan a seng hnem ber a, China, Russia, United Kingdom leh France te'n an dawt niin International Campaign to Abolish Nuclear Weapons (ICAN) annual report chuan a tarlang.
"Khawvel ram tam zawkte'n nuclear khap an duh laiin nuclear nei ramte'n kum 2021 chhung khan dan loa ralthuam lei nan sum ṭhahnem tak an seng a ni," tiin report chuan a sawi. "Ralthuam leina atana sum an hman hian Europe-a indona leh thil hlu tak takte a venghim thei lo a, khawvel huapa hripui leng thununna kawngah an hlawhchham a ni. Dik lo taka sum khawhralna hi kan tihtawp a ngai," a ti.
Thawhṭanni khan Stockholm International Peace Research (SIPRI) chuan nuclear ralthuam kawl ram pakuate chuan an ralthuamte chu an tihchak belh emaw an neih belh vek tih sawiin, Cold War hnua heng ralthuam hman mai theihna hun pawh kan tawng chho mek a ni, a ti. February thlaa Ukraine runtu, Russia ram chuan nuclear ralthuam hmanah pawh a lo vau tawh a ni.
ICAN tarlan danin, North Korea hian nikum khan nuclear lam chi ralthuam lei nan USD mtd 642 an hman thu leh, United Nations-in hrekna an siam chung leh hri leng vanga ramri an kharphui chung pawhin heti zat sum an hman theih tho thu a tarlang. Kum 2019-a khatih hunlaia US president Donald Trump nena nuclear ralthuam hmang lo tura inremna an siamte an bawhchhiat leh hnuah, kumin chhung pawh hian missile ṭhahnem tak an kapchhuak leh tawh a, kum 2017 hnua a vawi khatna atan nuclear ralthuam an enchhin leh dawn tih report a awm avangin hlauhthawnna lian tak a awm chho mek bawk.
International Campaign to Abolish Nuclear Weapons-in kum 2021 chhunga nuclear ralthuam atana an insen dan a tarlan chu -
United States $ tld 44.2
China $ tld 11.7
Russia $ tld 8.6
UK $ tld 6.8
France $ tld 5.9
India $ tld 2.3
Israel $ tld 1.2
Pakistan $ tld 1.1
North Korea $ mtd 642