Putin-an Ukraine-a National Guard thi chhungte tan USD 81,500 pe turin thupek tichhuak

Russia president Vladimir Putin chuan Thawhṭanni khan Ukraine leh Syria rama Russia National Guard thi chhungte hnenah ruble maktaduai nga (USD 81,500) pe turin thupek a tichhuak.

Thupek tihchhuah tharah hian guard member, Rosgvardia tiha sawiah hian Russia-in Ukraine-a special military operation a kalpui naa thite pawh a huam tel dawn a ni.

Russia chuan firfiaka chetna leh helpawl do turin kum 2016 khan Rosgvardia hi an din a, ramchhunga sorkar laka lungawi lohna lantirtute hnawtdarhtu atan hman an ni fo bawk.

Khawthlang lama analyst-te chuan indo ṭan tirh khan Russia hian Ukraine khawpui Kyiv bakah khawpui pawimawh dangte chu awlsam taka a lak mai theih a inring a, heng khawpuiahte hian dan kengkawh turin Rosgvardia-te hi dah zui a tum niin an sawi. Mahse an tum angin a thleng ta lo a, Kyiv leh khawpui lian ber dawttu Kharkiv aṭangin Russia sipaite chu nawr kir an ni a, tunah hian Donbas region-a khaw chhak lam lak tumin ṭan an khawh leh ta zawk a ni.

Putin hian sipai thi leh hliam tuarte chhawmdawlna tur, compensation scheme hi a lo puang tawh a ni. Russia-in March 25-a servicemen 1,351 an thih thu leh hliam mi 3,825 an awm tih an puan bak chu thi leh hliam tarlan an nei leh tawh lo. Ukraine leh khawthlang ram sorkar-te chuan thi zat hi an pun viau an rin thu an sawi thung.