Colombia-in lawng hlui pahnih hmuchhuak

Colombian naval official-te'n kum tam tak liamtaa rangkachak leh thil hlu ṭhahnem tak phurtu, San Jose lawng an zawnnaah hmanlai lawng pil pahnih an hmuchhuak tih president Ivan Duque chuan Thawhṭanni khan a sawi.

Historian-te sawidanin, San Jose lawng hi kum 1708-a Colombia-a Carribean lawng chawlh hmun, Cartagena aṭanga chhuaka pil zui taah hian rohlu, USD tluklehdingawn tel a phur a ni. Hei vang hian he lawng pil hmuhchhuah leh tum hian hun rei tak an lo zawng tawh a ni.

Remote hmanga thunun khawl hmangin tui chhungah metre 900-a thuka lawng an zawnnaah lawng dang pahnih hi hmuh a nih thu sawiin, heng lawngte hi kum 200 vel liamtaa Colombia-in Spain aṭanga zalenna suala an beih lai hun vela lawng an hman ṭhin ang niin an sawi.

"Area inangah thil pahnih kan hmuchhuak tawh a, thil hlui zawnchhuah nan kawng thar min hmuhchhuahtir zel a ni," tiin navy commander Admiral Gabriel Perez chuan a sawi.

Thlalak hlui aṭanga a lan danin, San Jose lawngah hian gold ingots leh coins, kum 1655 vela Seville-a siam cannon leh Chinese dinner service pawh a tel a ni. Navy leh sorkara archaeologist-te chuan plate-a thu inziak hmangin a siamchhuahna an zawng mek tih official-te chuan an sawi bawk.