Boris Johnson-a'n fiahna a paltlang, UK PM ni chhunzawm dawn

Britain prime minister Boris Johnson chuan Parliament-ah fiahna paltlang a, prime minister a nih chhunzawm zel thei dawn.

Parliament-a PM fiahnaah hian vote 359 tlain, PM thlawp lamah vote 211 leh duh lo lamah vote 148 a tla a ni.

An rama thil man sang leh Covid vanga lockdown an kalpui laiin dan phal lohin party an huaihawt avanga talbuai mek Johnson chuan Thawhṭanni khan fiahna hmachhawnin a paltlang.

Boris Johnson-a party, Conservative Party MP 40 chuangte chuan Covid vanga inkharkhip an kalpui laia a staff -te nen 10 Downing Street-a party an lo buatsaih avangin PM Johnson hi bang turin an nawr a ni. He dan bawhchhiatna hi partygate tiin a hming an vuah. Partygate sawiselna pung zel karah, Johnson bang tura nawrtu a party Conservative Party MP zingah 54 an tling chho a, trust vote la tura thlawptu member ngai zat 15% an tling tak avangin ballot hmangin PM Johnson-a hma lam hun hi an rel ta a ni.