World Bank-in Ukraine hnenah USD tld 3 pe dawn

World Bank chuan Russia-in a run a mek, Ukraine ram chhawmdawlna turin USD tluklehdingawn thum a pe dawn tih a sawi a, heng zinga USD maktaduai 350 chu pek chhuah nghal a tum a ni.

World Bank president David Malpass chuan International Monetary Fund managing director Kristalina Georgieva nena thuchhuah inṭawm an siamah, tunkar chhungin chhawmdawlna pek thawh khatna pekna tur hi Board pawmpui tura thehluh tum a ni tih thu an sawi. Hei bakah hian health leh education lama puihna tur USD 200 pawh pek leh nghal tum a ni, a ti.

IMF hian June thla thleng Ukraine tan hian USD tld 2.2 financing program a la nei mek a, hei bakah Ukraine-in emergency financing a dilna chu kar lehah ngaihtuah sak nghal a tum tih a sawi.

UN humanitarian coordinator Martin Griffiths chuan Russia bomb thlak hian pipe, electricity line leh basic service-te a tichhe nasa a, chhungkaw sang tel chu tui thianghlim in tur nei loin an awm mek tih a tarlang.

Taiwan hruaituten Ukraine tan an hlawh pe dawn
Taiwan president Tsai Ing-wen chuan nimin khan amah bakah vice president William Lai leh primier Su Tseng-chang te chuan an thla khat hlawh ṭheuh chu Ukraine chhawmdawl hna thawhna atan an pe dawn tih a sawi.

Taiwan sorkar hian tunkar chhung damdawi leh a hmanrua, ton 27 chu Ukraine tan athawn dawn bawk.