Germany-in France an hneh lo
UEFA Nations League-ah Germany tan chak ni hmel a la inher chhuak thei lo, Thawhlehni zan khan Stade de France-ah Die Mannschaft-in mualneitu France 2-1 in an hneh lo.
Joachim Low hote hian kum 2014 khan World Cup nomawi chawi mah se kum 2018-ah erawh vawi ruk chak loh an nei tawh a, Russia ramah first round an paltlang lo a, Nations League match thum khelh tawhah vawi hnih an chak tawh loh bawk avangin an tlak hniam lai ber a ni.
Mi thar nen
Joachim Low chuan Nethe-rlands an hneh loh ṭuma starting eleven aṭangin player panga ngawt a thlak a, Niklas Sule chuan inhliam Jerome Boateng thlakin Thilo Kehrer, Nico Schulz, Serge Gnabry leh Leroy Sane ten inkhel bul an ṭan.
An khelh dan pawh thlakin tlarhnungah defender pathum Sule, Hummels leh Kehrer te an awm a, insiamṭhat tumin khelh dan thar an hmang.
World champion lai France erawh an khelh danah an la chiang reng a, FIFA World Cup final-a Croatia an hneh ṭuma bul ṭantute aṭangin Samuel Umtiti chiah an tidanglam a, Barcelona defender aiah hian Presnel Kimpembe a lut.
Ṭha tluan tling lo
Germany-in inkhel bul an ṭan ṭha zawk a, first half-ah inkhel an thunun zawk. Man City winger Leroy Sane tlan chakna chu an hmanraw pawimawh a ni a, Kimpembe handball vanga an penalty hmuh chu minute 14-na lekah Toni Kroos-a'n a khung.
Mikhual team an che ṭha chhunzawm a, Matthias Ginter cross ball ṭha zet chu France keeper Hugo Lloris-a'n khawih per leh hman hlauhin Timo Werner zawn a thleng hman lo chiah. Second half-ah erawh France an insiam ṭha a, Germany tlarhnung tan Kylian Mbappe chu buaina tham a tling.
Minute 62-naah Lucas Hernandez cross chu Antoine Griezmann-a'n mawi zetin a tauh lut a, keeper Manuel Neuer dem theih a ni lo. France forward hian minute 80-naah Blaise Matuidi penalty hlawhchhuah chu chakna goal khung nan a hmang.
Engtin zel?
Germany-in Netherlands leh France hneh loh zawn mah se Netherlands hi an la hmachhawn leh dawn avangin League A aṭangin an la relegate bik lo. Les Bleus erawh match thum an khelh tawhah point sarih hmu tawhin hmahruaitu an ni mek.
Die Mannschaft coach Joachim Low chuan, "Kan khelh danah lunghnur na tur a awm lo. World champion nen kan inkhing tawk a, goal hnihna kan khung ta lo kha a pawi ta a ni. Kan khelh dan thlir chuan hmabak kan nei êng hle a ni," tiin a sawi.
Germany football president Reinhard Grindel chuan, "Griez-mann goal ang kha chu dan ngaihna a awm lo a, penalty kan chawi leh bawk. Kan khelh danah erawhin team ṭha tak kan din leh dawn tih rinna nghet tak min pe a ni," tiin chak lo mah se lawmna tur a awm thu a sawi.