US-in ISKP hotu chanchin hrilh theih hnenah lawmman $mtd 10 pek tiam

United States chuan Afghanistan-a ISIL (ISIS) firfiak pawl hotu, Sanaullah Ghafari awmna chin emaw a chanchin emawm hrilh thei hnenah USD maktaduai 10 thleng pek a tiam.

US State Department chuan Thawhṭanni khan thuchhuah siamin, nikum lama Kabul airport-a thihchilh bomb tipuaktu Khorasan Province-a ISKP (ISIS-K) zinga mawhphurtu ber Ghafari chinchang h-ria hnenah hian lawmman pek an tiam thu hi an sawi.

Nikum August 26 khan US-in Afghanistan chhuahsan tura an inbuatsaih laiin, Afghanistan khawpuiah inbeihna hi a thleng a, hetah hian Afghan mi 170 leh US service mi 13 an thi a ni. Kabul Airport beihna thleng chungchang US military-in a chhuichhianna, February 4-a an tihchhuahah mipui ṭhahnem tak an punkhawm laiin mi pakhat chuan explosive device chi khat ball bearing hmanga thuam chu a hmet puak tih an tarlang.

Ghafari, Shahab al-Muhajir tia hriat hi June 2020 khan ISKP hotuah ruat a nih thu US State Department chuan sawiin, Afghanistan-a ISKP chetlakna zawng zawnga remtihna petu leh an pawl tana sum hailuttu pawimawh tak pakhat a ni. Ghafari chungchang hi hriat tur tam lo mah se, Taliban-a thiltithei ber leh mite hlauh rawn ni ṭhin, al-Qaeda commander hlui emaw Haqqani network member hlui emaw nia sawi a awm bawk.

US chuan nikum November thla khan Ghafari hi blacklist “specially designated global terrorist” zingah a dah. Ani bakah hian an pawl member pahnih, Sultan Aziz leh senior leader Maulawi Rajab Salahudin-te pawh blacklist zinga hian telh an ni.