SKorea-in 'rising sun' flag dahbo turin Japan ngen

South Korea chuan karlehah Jeju island-a international fleet review neih tura tel tur, Japan indo lawng lian-a ni chhuak lai lem, 'rising sun' naval flag a tar chu dahbo turin Japan a ngen.

South Korea mi tam tak chuan ni chhuak lai thla hi Indopui II hunlaia Japan sipaite chet dan rawng tak lantirtu angah an ngai a, hei vang hian October 10-14 chhunga hun hman tura tarchhuah an tum pawh hi an duh lo hle a ni.

Ningani khan South Korea Foreign Minister Kang Kyung-wha chuan South Korea miten indopui a tawp hmaa Korean Peninsula-a Japan te chetdan an hriatreng dante chu Japan chuan a ngaihtuah pui ve a ngai a ni, a ti.

Jeju island-a intenational fleet review neih tura tel tur, ram 14-te chu an lawngah an ram flag leh South Korea flag te tar turin SKorea Navy chuan a lo ngen tawh a, hetihlai hian Japan lawnga 'rising sun' flag tar erawh a duh lo a ni. Foreign Ministry chuan hemi chungchangah hian Japan sorkar pawh inbiakna a lo neihpui tawh a ni.

Hetihlai hian Japan chuan South Korea thil phut hi a dodal thung. Japan Defence Minister Itsunori Onodera chuan kar hmasa khan Japan dan hnuaiah 'rising sun' flag tar chu tih ngei ngei tur a nih thu sawiin, he flag hi Japan Navy lawng a ni tih tihlanna a ni bawk a ni, a ti. Onodera hi tunkar tir lama cabinet siksawi a ni khan thlak a ni tawh thung.